سندھی بھائیوں کے ساتھ ناانصافی ہوگی تو ساتھ کھڑا ہوں، آفاق احمد

ہم سب سندھ کے ہیں، ہمارے مسائل ایک ہیں،ہر مسئلے کو اپنا مسئلہ سمجھنا ہوگا، چیئرمین مہاجر قومی موومنٹ

ہفتہ 8 مارچ 2025 16:55

کراچی(اُردو پوائنٹ اخبارتازہ ترین - این این آئی۔ 08 مارچ2025ء)مہاجر قومی موومنٹ کے چیئرمین آفاق احمد نے کہا ہے کہ جہاں سندھی بھائیوں کے ساتھ ناانصافی کی بات ہوگی تو ساتھ کھڑا ہوں۔ دریائے سندھ سے نئی نہروں کے فیصلے پر صدر زرداری کے دستخط ہیں، سندھ کے مفادات پر سودے پر شہری و دیہی سندھ کے عوام سراپا احتجاج ہیں۔ سٹی کورٹ میں وکلا کے بھوک ہڑتالی کیمپ کے دورے کے موقع پر بات کرتے ہوئے آفاق احمد نے کہا کہ میرا یہاں بھرپور استقبال ہوا ہے۔

پانی کا مسئلہ صرف سندھیوں کا نہیں ہم سب کا ہے۔ ہم سب سندھ کے ہیں، ہمارے مسائل ایک ہیں۔ ہر مسئلے کو اپنا مسئلہ سمجھنا ہوگا۔ انہوں نے کہا کہ سندھ کے عوام کی تکالیف کا کوئی پرسان حال نہیں۔ سندھ میں پانی کے مسئلے پر سندھ کے عوام کی آواز نہیں سنی گئی۔

(جاری ہے)

سندھ کے عوام وڈیروں کی زیادتی کا شکار ہیں۔ ہمیں ان سب کیخلاف متحد ہونا چاہیے۔ سندھ کے مسائل کے لیے شہری اور دیہی باشندے ایک ہیں۔

اگر دریائے سندھ کے پانی پر پنجاب نے ڈاکا ڈالا تو ہم شہری سندھ بھی احتجاج کریں گے۔ آفاق احمد نے کہا کہ افسوس کی بات ہے کہ نکالی جانے والی 6 نہروں کے منصوبے کی منظوری صدر آصف زرداری نے دی ہے۔ ان نہروں کیخلاف سندھ اسمبلی سے قرارداد پاس ہونی چاہیے۔ حکمران اپنے مفادات کے لیے صوبے کے مفادات کا سودا کررہے ہیں۔ پانی کا مسئلہ ہو یا کوئی بنیادی مسئلہ سندھ کے مستقل باشندے یک زبان ہیں۔

قبل ازیں جوڈیشل مجسٹریٹ غربی کی عدالت کے روبرو سرجانی ٹان میں واٹر ٹینکر نذرِ آتش کرنے کے مقدمے کی سماعت ہوئی، جس میں چیئرمین مہاجر قومی موومنٹ آفاق احمد عدالت میں پیش نہیں ہوئے جب کہ وکیل صفائی جاوید چھتاری نے موقف دیا کہ کہ چالان نہیں آیا تو سماعت ملتوی کی جائے۔ عدالت نے سماعت بغیر کسی کارروائی کے 25 مارچ تک ملتوی کردی۔