مسلم ممالک نے ہمیشہ کشمیری عوام کے حق خودارادیت کی حمایت کی ہے ، بیرسٹر سلطان محمود چوہدری

مظفرآباد (اُردو پوائنٹ اخبارتازہ ترین - اے پی پی۔ 13 مارچ2025ء) صدر آزاد کشمیر بیرسٹر سلطان محمود چوہدری نے کہا ہے کہ امت مسلمہ کشمیر میں جاری مظالم بند کرانے اور مسئلہ کشمیر کے حل کے لئے بھارت پر دبائو بڑھائے اور اس سلسلے میں او آئی سی بھی اپنا کردار ادا کرے، مسلم ممالک نے ہمیشہ کشمیری عوام کے حق خودارادیت کی حمایت کی ہے اور ہمیں امید ہے کہ اب بھی مسلم اُمہ کشمیری عوام کے موقف کے تائید کرے گی اور اقوام متحدہ کی قراردادوں کے مطابق کشمیری عوام کو اُن کا حق خودارادیت دلوانے کے لئے اپنا کردار ادا کرے گی ۔

ان خیالات کا اظہار انہوں نے یہاں درالحکومت مظفرآباد کے ایک مقامی ہوٹل میں سابق مشیر حکومت سردار تبارک کی طرف سے اپنے اعزاز میں دئیے گئے افطار ڈنر سے بطور مہمان خصوصی خطاب کرتے ہوئے کیا۔

(جاری ہے)

اس موقع پر افطار ڈنر میں وزیر حکومت چوہدری محمد رشید، سابق مشیر حکومت و میزبان سردار تبارک، سابق وزیر حکومت چوہدری مقبول احمد، صدارتی مشیر سردار امتیاز خان، سابق چیف جسٹس چوہدری محمد ابراہیم ضیائ، راجہ مدد، منیر سلہریا، امتیاز عباسی، اور دیگر بھی موجود تھے۔

اس موقع پر صدر آزاد جموں وکشمیر بیرسٹر سلطان محمود چوہدری نے مزید کہا کہ میں نے اپنے حالیہ امریکہ اور برطانیہ کے دورے میں بھی اوورسیز کشمیریوں پر زور دیا کہ وہ بھارت کے غیر قانونی زیر تسلط جموں و کشمیر کے عوام کی آواز دنیا کے ایوانوں تک پہنچائیں جبکہ میں آپ لوگوں سے بھی کہوں گا کہ اب چونکہ سوشل میڈیا کا دور ہے اور نوجوانوں کو سوشل میڈیا کے ذریعے بھارت کے غیر قانونی زیر تسلط جموں و کشمیر میں جاری بھارتی مظالم کو بے نقاب اور مسئلہ کشمیر کو اُجاگر کرنے کے لئے اپنا رول ادا کرنا چاہیے۔

انہوں نے کہا کہ جب میں وزیر اعظم تھا تو میں نے جاگراں ہائیڈرو پروجیکٹ شروع کیا تھا اور اب تک اس کی آمدنی 8ارب روپے سے زائد ہو چکی ہے جبکہ اس کی ماہانہ آمدنی تقریباً 4کروڑ روپے ہے۔ اگر اس طرح کے دیگر منصوبے شروع کیے جائیں تو امید واثق ہے کہ انشاء اللہ آزادکشمیر جلد خود کفالت کی منزل کی جانب گامزن ہو جائے گا۔ اسی طرح میں نے میرپور میں سوئی گیس لائی تھی اور اب چونکہ کوہالہ تک سوئی گیس آ چکی ہے اور میں کوشش کر رہا ہوں کہ مظفرآباد میں بھی سوئی گیس فراہم کی جائے۔

اسی طرح میرپور مظفرآباد مانسہرہ موٹروے کی تعمیر میرپور میں سی پیک بزنس سنٹر کا قیام راولاکوٹ اور مظفرآباد کے ائیرپورٹس کو وسعت دینے اور فعال کرنے کے لئے بھی میں اپنی کوششیں جاری رکھے ہوئے ہوں۔ اس سلسلے میں، میں نے وفاقی حکومت سے بھی بات کی ہے۔