مذاکرات کا موقع ہم نے نہیں حکومت نے ضائع کیا ہے،بیرسٹر گوہر

بانی پی ٹی آئی سے چھ مہینے سے کسی ایک شخص کو بھی نہیں ملوایا گیا، بچوں سے بھی ریگولر بات نہیں ہوتی‘میڈیا سے گفتگو

ہفتہ 15 مارچ 2025 22:42

اسلام آباد(اُردو پوائنٹ اخبارتازہ ترین - آن لائن۔ 15 مارچ2025ء) چیئرمین تحریک انصاف بیرسٹر گوہرنے کہا ہے کہ مذاکرات کا موقع ہم نے نہیں حکومت نے ضائع کیا ہے،بانی پی ٹی آئی سے چھ مہینے سے کسی ایک شخص کو بھی نہیں ملوایا گیا، بچوں سے بھی ریگولر بات نہیں ہوتی۔ چیئرمین تحریک انصاف بیرسٹر گوہر نے یہاں میڈیا سے گفتگو کرتے ہوئے کہا کہ ہم نے چار دسمبر کو مزاکرات کے لیے کمیٹی بنائی 23 دسمبر کو پہلی میٹنگ ہوئی،دو جنوری کو دوسری اور سولہ جنوری کو تیسری میٹنگ ہوئی، ہم نے حکومت کے آگے دو مطالبات رکھے تھے، حکومت نے مطالبات لکھے ہوئے مانگے تو ہم نے لکھے ہوئے دیے، بانی پی ٹی آئی نے کہا تھا کہ حکومت اگر کمیشن بنانے کے لیے آمادگی کا اظہار کرتی ہے تو ہم ان کے ساتھ بیٹھیں گے، سپیکر صاحب کو معلوم ہے کہ یہ موقع ہماری طرف سے ضائع نہیں ہوا حکومت نے ضائع کیا ہے۔

(جاری ہے)

بیرسٹر گوہر نے کہا کہ بانی پی ٹی آئی سے چھ مہینے سے کسی ایک شخص کو بھی نہیں ملوایا گیا، بانی پی ٹی آئی کی بچوں سے بھی ریگولر بات نہیں ہوتی، ہم اس پر بارہا کہہ چکے ہیں کہ یہ کورٹ کے آرڈر اور انسانی حقوق کی خلاف ورزی ہو رہی ہے۔ انہوں نے کہا کہ پاکستان تحریک انصاف ایسی پارٹی نہیں کہ لوگوں پر قدغنیں لگائے، ہماری پارٹی میں جمہوریت ہے جو شحص جس پوائنٹ پر بات کرنا چاہتا ہے کھل کر کرتا ہے، ہم جو فیصلہ کرتے ہیں تو پارٹی میں سب لوگ اس کو تسلیم کرتے ہیں۔

بیرسٹر گوہر نے کہا کہ ڈی جی آئی ایس پی آر نے کل بہت اچھی پریس کانفرنس کی ہے۔ سکیورٹی فورسز نے بہت اچھا رول پلے کیا ہے اور ایک بہت بڑے سانحے سے بچایا یے، آرمی سکول کی طرح ایک اور سانحہ ہو سکتا تھا،سکیورٹی فورسز نے بروقت کارروائی کر کے سانحے سے بچایا۔