حکمرانی کو موثر، فعال اور ذمہ دار بنانے میں مصنوعی ذہانت کا کلیدی کردار ہے، چیئرمین سینیٹ سید یوسف رضا گیلانی

اسلام آباد (اُردو پوائنٹ اخبارتازہ ترین - اے پی پی۔ 16 جون2025ء) چیئرمین سینیٹ سید یوسف رضا گیلانی نے کہا ہے کہ حکمرانی کو موثر، فعال اور ذمہ دار بنانے میں مصنوعی ذہانت کا کلیدی کردار ہے، جدید ٹیکنالوجی کو اس طریقے سے اپنائیں کہ پارلیمانی نظام میں انقلابی تبدیلیاں رونما ہوں۔ پیر کو سینیٹ میں منعقدہ مصنوعی ذہانت سے متعلق نالج سیشن سے خطاب کرتے ہوئے چیئرمین سینیٹ نے کہا کہ اپنی عوامی خدمت اور سیاسی سفر کے دوران ہمیشہ اس یقین کو مضبوطی سے تھاما کہ حکومت کا مستقبل جدید ٹیکنالوجی کو اپنانے میں ہے،ایوان بالا نے قانون سازی میں جدیدیت کے لئے انتہائی اہم پیش رفت کی ہے۔

چیئرمین سینیٹ نے کہا کہ ڈیجیٹل گورننس، ڈیٹا پر مبنی فیصلہ سازی اور عوامی خدمت کی بہتری کے لیے مصنوعی ذہانت کا استعمال اب کوئی سوال نہیں بلکہ ایک ضروری حصہ بن چکا ہے،مصنوعی ذہانت پارلیمان کو عوام سے بہتر طور پر جوڑنے اور ڈیٹا کا بروقت تجزیہ کرنے کی صلاحیت رکھتی ہے۔

(جاری ہے)

چیئرمین سینیٹ نے کہا کہ حکمرانی کو موثر، فعال اور ذمہ دار بنانے کے لیے مصنوعی ذہانت کا کردار کلیدی ہے،یورپی یونین کی سفیر ڈاکٹر رینا کیونکا، عامر ابراہیم، سی ای او جاز اور معزز شرکا کو خوش آمدید کہتا ہوں ،یورپی یونین مشن کا شکریہ جنہوں نے پارلیمانی کارکردگی کو بہتر بنانے کے لیے مسلسل تعاون فراہم کیا۔

چیئرمین سینیٹ نے کہا کہ سفیریورپی یونین کی بدولت پارلیمانی بجٹ آفس کے قیام اور سینیٹ کے لیے مصنوعی ذہانت ٹولز کی تیاری ممکن ہوئی۔ سید یوسف رضا گیلانی نے کہا کہ یورپی یونین کی پارلیمانی اداروں کے ساتھ وابستگی کو سراہتے ہیں اور مستقبل میں تعاون کے فروغ کے خواہاں ہیں ۔ چیئرمین سینیٹ نے ردا قاضی مشیر برائے خصوصی اقدامات اور پارلیمانی ترقیاتی یونٹ، سینیٹ سیکرٹریٹ، مستحکم پارلیمان اور پپس کو خراج تحسین پیش کیا۔

انہوں نے کہا کہ اس سیشن کا موضوع میرے دل کے بہت قریب ہے،حکومت کا مستقبل جدید ٹیکنالوجی کو اپنانے میں مضمر ہے،بحیثیت وزیراعظم پاکستان میری حکومت نے ٹیکنالوجی اور آئی ٹی کے شعبے کو سماجی و اقتصادی اور نالج و ڈیجیٹل اکانومی کا محور قرار دیتے ہوئے خصوصی توجہ دی۔ چیئرمین سینیٹ نے کہا کہ پسماندہ علاقوں میں آئی ٹی انسٹیٹیوٹس قائم کیے، عالمی ٹیکنالوجی کمپنیوں سے شراکت داری کی ترغیب دی، سرکاری محکموں میں ڈیجیٹل رسائی کو فروغ دینے اور نظام کی جدت کے لیے ہمیشہ پرعزم رہا۔

سید یوسف رضا گیلانی نے کہا کہ ایوان بالا نے قانون سازی کی جدیدیت کی جانب اہم پیش قدمی کی ہے، ایوان بالاخطے کا پہلا پارلیمانی ادارہ بن چکا ہے جس نے مقامی طور پر تیار کردہ مصنوعی ذہانت چیٹ بوٹ کی تیاری کا آغاز کیا۔ سید یوسف رضا گیلانی نے کہا کہ مصنوعی ذہانت چیٹ بوٹ اراکینِ پارلیمنٹ کو قانون سازی، کمیٹی کارروائی اور دیگر معلومات تک فوری رسائی دے گا۔

مصنوعی ذہانت (اے آئی) چیٹ بوٹ وقت کی بچت، مسودہ نویسی، نگرانی اور پالیسی سازی میں بہتری لائے گا، جھوٹے بیانیے اور غلط معلومات کے پھیلائو کے خلاف مصنوعی ذہانت کی صلاحیت کلیدی ہے،یورپی پارلیمنٹ کی مصنوعی ذہانت ریگولیشن کا پہلا فریم ورک قابل تقلید ماڈل ہے۔ چیئرمین سینیٹ سید یوسف رضا گیلانی نے کہا کہ پارلیمانی شعبے میں مصنوعی ذہانت کا ذمہ دارانہ استعمال ناگزیر ہے،ٹیکنالوجی کے شعبے کے ساتھ مزید گہرے اشتراک کے خواہاں ہیں تاکہ قومی مفاد میں جدت لائی جا سکے۔