گاڑیاں سستی ہونے کا امکان

آئی ایم ایف کے مطالبے پر حکومت کی جانب سے درآمدی ڈیوٹیز کم کرنے کا فیصلہ کر لیا گیا

محمد علی جمعرات 20 مارچ 2025 20:14

لاہور (اُردو پوائنٹ اخبارتازہ ترین۔ 20 مارچ2025ء) گاڑیاں سستی ہونے کا امکان، آئی ایم ایف کے مطالبے پر حکومت کی جانب سے درآمدی ڈیوٹیز کم کرنے کا فیصلہ کر لیا گیا۔ تفصیلات کے مطابق آئی ایم ایف کے ایک مطالبے کے نتیجے میں پاکستان میں طویل عرصے بعد گاڑیاں سستی ہونے کا امکان پیدا ہو گیا ہے۔ ایکسپریس نیوز کی رپورٹ کے مطابق حکومت نے آئی ایم ایف کا بڑا مطالبہ تسلیم کر لیا، جس کے تحت آئندہ 5 برس میں اوسط درآمدی ٹیرف ایک تہائی کم کرکے 7.1 فیصد تک لایا جائے گا۔

ذرائع کے مطابق حکومت نے اضافی کسٹمز ڈیوٹیز مکمل ختم کرنے، ریگولیٹری ڈیوٹیز میں 75 فیصد کمی اور کسٹمز ایکٹ کے پانچویں شیڈول کے تحت رعائتیں واپس لینے پر اتفاق کیا ہے۔ 5 برسوں میں مجموعی اوسط ٹیرف موجودہ 10.6فیصد سے کم کرکے7.1 فیصد پر لائے جائیں گے، جس کا آغاز رواں سال جولائی سے ہوگا۔

(جاری ہے)

آئی ایم ایف کیساتھ اس مفاہمت پر عملدرآمد رواں سال جولائی میں تشکیل پانے والی نئی قومی ٹیرف پالیسی کے ذریعے جبکہ نئی آٹو انڈسٹری ڈویلپمنٹ اور ایکسپورٹ پالیسی پر جولائی 2026 سے ہوگا۔

پاکستان نے آئی ایم ایف کو یقین دہانی کرائی ہے کہ جون کے آخر تک وفاقی کابینہ سے نئی ٹیرف پالیسی کی منظوری حاصل کرلے گا۔ ٹیرف میں کمی پر عملدرآمد آئندہ مالی سال کے بجٹ میں ہوگا جسے جون میں پارلیمنٹ میں پیش کیا جانا ہے۔ آٹو سیکٹر پر عائد ٹیرف میں بڑی تبدیلیوں سے گاڑیاں سستی ہو جائیں گی۔ بتایا گیا ہے کہ حکومت 2030 تک آٹو انڈسٹری کیلئے غیر ضروری تحفظ ختم کرنے کیلئے پرعزم ہے، حکومت نے کسٹم ڈیوٹی سلیبس کو بھی معقول بنانے کی یقین دہائی کرائی ہے، آٹو سیکٹر کیلئے اوسط ٹیرف 5.6 فیصد تک لایا جائے گا۔

اس اقدام کی بدولت گاڑیوں کی قیمتوں میں نمایاں کمی کا امکان ظاہر کیا جا رہا ہے۔ واضح رہے کہ پاکستان کا آٹو سیکٹر گزشتہ 3 سالوں سے بدترین زوال کا شکار ہے۔ تاہم درآمدی ڈیوٹیز میں کمی کے نتیجے میں پاکستان کے آٹو سیکٹر میں دوبارہ سے بہتری کا امکان ظاہر کیا جا رہا ہے۔