خیبرپختونخواہ میں ہر قسم کی کاروباری ادائیگیوں کیلئے یونیورسل ڈیجیٹل پیمنٹ سسٹم کے اجراء کا فیصلہ

خیبر پختونخوا کیش لیس سسٹم متعارف کروانے والا ملک کا پہلا صوبہ ہوگا، ڈیجیٹل پیمنٹ سسٹم سے دھوکہ دہی اور بدعنوانی کا مکمل خاتمہ ہوگا، جبکہ اس نظام سے ٹیکس کولیکشن میں بہتری آئے گی۔ وزیراعلی خیبرپختونخوا علی امین گنڈاپور

ثنااللہ ناگرہ جمعرات 20 مارچ 2025 21:55

خیبرپختونخواہ میں ہر قسم کی کاروباری ادائیگیوں کیلئے یونیورسل ڈیجیٹل ..

اسلام آباد ( اردوپوائنٹ اخبار تازہ ترین۔ آئی پی اے ۔ 20 مارچ 2025ء ) وزیراعلی خیبر پختونخوا علی امین گنڈاپور کی زیر صدارت اجلاس۔ متعلقہ کابینہ اراکین، چیف سیکرٹری، ایڈیشنل چیف سیکرٹری، متعلقہ انتظامی سیکرٹریز اور دیگر حکام کی شرکت۔ اجلاس میں مختلف نوعیت کے سرکاری زمینوں کی لیز پالیسی سے متعلق معاملات کا تفصیلی جائزہ۔ صنعتوں کو دی گئی غیر مستعمل اربوں روپے مالیت کی زمینوں سے متعلق اہم فیصلہ، صنعتیں لگانے کے لئے دی گئی وہ زمینیں جن پر ابھی تک صنعتیں نہیں لگائی گئی انہیں واپس لیا جائےگا، محکمہ صنعت اور بورڈ آف ریونیو صوبہ بھر میں ایسی تمام سرکاری زمینوں کی نشاندہی کریں، نشاندہی کے بعد ان زمینوں کو سرکاری تحویل میں لینے کے لئے اقدامات کئے جائیں، ان زمینوں کو کسی اور مقصد کے لئے استعمال ہونے کی اجازت نہیں دی جائے گی، وزیراعلی کی ہدایت، صوبے کے مختلف اضلاع میں صنعتیں لگانے کے لئے زمینیں دی گئی ہیں تاکہ صوبے میں صنعتوں کو فروع ملے اور روزگار کے مواقع پیدا ہوں لیکن بہت ساری زمینوں پر ابھی تک صنعتیں نہیں لگائی گئی ہیں، ایسی زمینوں کی موجودہ مارکیٹ ویلیو اربوں روپے ہے، صنعتیں نہ لگنے سے ان زمینوں کی فراہمی کا اصل مقصد فوت ہو رہا ہے، ان زمینوں کے موثر استعمال کے ذریعے صوبائی حکومت کے آمدن میں خاطر خواہ اضافہ کیا جاسکتا ہے، اجلاس میں کاروباری مقاصد کے لئے سرکاری زمینوں کو لمبی مدت کے لئے لیز پر دینے سے متعلق امور پر غور و خوص۔

(جاری ہے)

اس مقصد کے لئے قوانین میں ضروری ترامیم کے لئے قائم کمیٹی کی سفارشات اگلے کابینہ اجلاس میں منظوری کے لئے پیش کرنے کا فیصلہ، کمیٹی اس سلسلے میں تمام متعلقہ قوانین کا بغور جائزہ لے کر حتمی سفارشات کابینہ کے اگلے اجلاس میں پیش کرے۔ اسی طرح خیبر پختونخوا حکومت کا ڈیجیٹل ٹرانسفارمیشن کی طرف ایک انقلابی اور تاریخی قدم۔ صوبے میں ہر قسم کی لین دین اور کاروباری ادائیگیوں کے لئے یونیورسل ڈیجیٹل پیمنٹ سسٹم کے اجراء کا فیصلہ۔

"کیش لیس خیبر پختونخوا" کے برانڈ نام یونورسل ڈیجیٹل پیمنٹ سسٹم پر عمل درآمد کے لئے اسٹریٹجی تیار۔ اسٹریٹجی کے تحت مختلف محکموں، اداروں اور ضلعی انتظامیہ کو ٹائم لائنز کے ساتھ ذمہ داریاں تفویض کردی گئی ہیں۔

اس سسٹم کے تحت ہر قسم کے چھوٹے بڑے کاروبار اور نجی و سرکاری لین دین کے لئے آن لائن ادائیگی لازمی ہوگی۔ اس سسٹم کے نفاذ سے کاروباری لوگوں کے ساتھ ساتھ عوام کو بھی ادائیگیوں کے عمل میں سہولت ہوگی۔

خیبر پختونخوا کیش لیس سسٹم متعارف کروانے والا ملک کا پہلا صوبہ ہوگا۔ یونیورسل ڈیجیٹل پیمنٹ کا یہ سسٹم آن لائن ادائیگیوں کی سہولت فراہم کرنے والے موبائل کمپنیوں کے اشتراک سے قائم کیا جائے گا۔ ڈیجیٹل ادائیگیوں کا یہ نظام آف لائن بھی کام کرے گا۔ اس سسٹم پر عملدرآمد کے لئے ویلیج کونسلز کی سطح پر چھوٹے بڑے تمام دوکانوں، اسٹالز، ریڑھیوں وغیرہ کا ڈیٹا اکٹھا کیا جائے گا۔

کیش لیس خیبر پختونخوا پروگرام کے تحت تمام چھوٹے بڑے کاروباری مراکز، پبلک ٹرانسپورٹ وغیرہ کے لئے کیو آر کوڈ آویزاں کرنا لازمی ہوگا۔ ڈیجیٹل پیمنٹ سسٹم پرموثر انداز میں عمل درآمد کے لیے مضبوط ریگولیٹری فریم ورک نافذ کیا جائے گا۔ یونیورسل ڈیجیٹل پیمنٹ سسٹم پر عملدرآمد یقینی بنانے کے لئےضلعی انتظامیہ کی سربراہی میں ایک منظم طریق کار وضع کیا جائے گا۔

ڈیجیٹل پیمنٹ سسٹم سے متعلق عوامی آگاہی کے لیے بھرپور مہمات کا انعقاد کیا جائے گا۔ کاروباری حضرات اور عوام کے لیے ٹریننگ پروگرام اور سپورٹ سروسز کا انتظام کیا جائے گا۔ اس سسٹم کی مانیٹرنگ اور ایوالویشن کے لیے صوبائی حکومت اور موبائل والٹ سروس پارٹنر کے باہمی تعاون سے ڈیش بورڈ قائم کیا جائے گا۔ وزیراعلیٰ سیکرٹریٹ، محکمہ خزانہ، آئی ٹی بورڈ، پی ایم آر یو اور ضلعی انتظامیہ پرفارمینس ٹریکنگ اور متواتر رپورٹنگ کی نگرانی کریں گے۔

وزیر اعلیٰ خیبرپختونخوا علی امین گنڈاپور نے "کیش لیس خیبرپختونخوا انیشیٹو" پر عمل درآمد کی ہدایات جاری کر دیں۔ اس سلسلے وزیر اعلیٰ سیکرٹریٹ کی طرف سے چیف سیکرٹری کو باضابطہ مراسلہ جاری کردیا گیا۔ مراسلے میں تمام متعلقہ محکموں اور اداروں کو مقررہ ٹائم لائینز کے مطابق اپنی ذمہ داریوں کو پوری کرنے کی ہدایت کی گئی ہے۔ یونیورسل ڈیجیٹل پیمنٹ سسٹم صوبائی حکومت کا ایک انقلابی اقدام ہے، *کیش لیس انیشٹیو" ڈیجیٹل خیبر پختونخوا پروگرام کا حصہ ہے، اس سسٹم کے ذریعے صوبے میں ڈیجیٹل اکانومی کو فروغ دینے میں مدد ملے گی، خیبر پختونخوا یہ نظام متعارف کروانے والا ملک کا پہلا صوبہ ہے۔

ڈیجیٹل پیمنٹ سسٹم کے نفاذ سے تمام کاروباری سرگرمیوں کا جامع اکنامک ڈیٹا بیس قائم کرنے میں بھی مدد ملے گی، جس کے نتیجے میں مستقبل کے لئے پالیسی سازی اور منصوبہ بندی میں آسانی ہو گی، اس سے جدید فن ٹیک سلوشن کی حوصلہ افزائی ہو گی، ڈیجیٹل اکانومی اور معاشی تحفظ کو فروغ ملے گا، اس اقدام سے صوبے کو بین الاقوامی سطح پر ڈیجیٹل پیمنٹ سسٹم سے ہم آہنگ بنانے، موثر مالی لین دین کو فروغ دینے میں مدد ملے گی۔

ڈیجیٹل پیمنٹ سسٹم سے مالیاتی شفافیت، معاشی ترقی کو فروغ ملے گا جبکہ دھوکہ دہی اور بدعنوانی کا مکمل خاتمہ ہو گا، اس نظام سے ٹیکس کولیکشن میں بہتری آئے گی اور کاروبار دوست ماحول قائم ہو گا، ڈیجیٹل پیمنٹ سسٹم کے اجراء سے صوبے میں نجی سرمایہ کاری کو فروغ دینے میں مدد ملے گی۔