امریکا نے سراج الدین حقانی کی گرفتاری پر ایک کروڑ ڈالر انعامی رقم ختم کردی، طالبان کا دعویٰ

حقانی نیٹ ورک کے دیگر رہنماؤں عبدالعزیز حقانی اور یحییٰ حقانی پر انعامی رقم ختم کردی ہے‘ افغان میڈیا کا دعویٰ

اتوار 23 مارچ 2025 11:35

کابل (اُردو پوائنٹ اخبارتازہ ترین - این این آئی۔ 23 مارچ2025ء)افغانستان کی وزارت داخلہ نے دعویٰ کیا ہے کہ امریکا نے افغان وزیر داخلہ سراج الدین حقانی کی گرفتاری پر ایک کروڑ ڈالر کی انعامی رقم ختم کردی۔طالبان کی جانب سے یہ دعویٰ ایسے وقت میں سامنے آیا ہے جب گزشتہ دنوں ہی امریکی وفد نے کابل کا دورہ کیا تھا۔طالبان اور امریکی وفد کے درمیان کابل میں اہم ملاقات میں امریکی خصوصی ایلچی برائے مغوی افراد ایڈم بوہلر اور زلمے خلیل زاد شامل تھے، اس وفد نے اہم رہنماؤں سے ملاقاتیں کی تھیں جس کے بعد طالبان نے امریکی شہری جارج گلیزمن کو رہا کیا تھا۔

اب افغان وزارت داخلہ کے ترجمان نے دعویٰ کیا کہ امریکا نے وزیر داخلہ سراج الدین حقانی کی گرفتاری پر ایک کروڑ ڈالر انعامی رقم ختم کردی ہے۔

(جاری ہے)

تاہم امریکی محکمہ خارجہ نے اس پر کوئی ردعمل نہیں دیا۔ دوسری جانب امریکا کی فیڈرل بیورو آف انویسٹی گیشن (ایف بی آئی) کی ویب سائٹ پر سراج الدین حقانی کے گرفتاری پر ایک کروڑ ڈالر انعامی رقم کا اشتہار اب بھی موجود ہے۔

اُدھر افغان میڈیا نے بھی دعویٰ کیا ہے کہ امریکا نے سراج الدین حقانی ہی نہیں بلکہ حقانی نیٹ ورک کے دیگر رہنماؤں عبدالعزیز حقانی اور یحییٰ حقانی پر انعامی رقم ختم کردی ہے، ان دونوں رہنماؤں کی اطلاع دینے پر 50 لاکھ ڈالر انعامی رقم رکھی گئی تھی۔یاد رہے کہ سراج الدین حقانی اقوامِ متحدہ کی جانب سے جاری کردہ دہشت گردوں کی بلیک لسٹ میں موجود ہیں اور امریکی محکمہ خارجہ کی جانب سے ان کے بارے میں معلومات دینے پر پہلے 50 لاکھ ڈالر اور بعد میں ایک کروڑ ڈالر انعام کا اعلان کیا گیا تھا۔