ایل جی ایف کی’’ وہ بولتی ہے، وہ قیادت کرتی ہے، وہ تبدیلی لاتی ہے ‘‘کے عنوان پر کانفرنس

وزیر اقلیتی امور رمیش سنگھ اروڑہ کی بطور مہمان خصوصی ،ممبران پنجاب اسمبلی اعجاز عالم آگسٹین سمیت دیگر کی بھی شرکت

منگل 25 مارچ 2025 17:38

لاہور (اُردو پوائنٹ اخبارتازہ ترین - این این آئی۔ 25 مارچ2025ء)صوبائی وزیر برائے اقلیتی امور رمیش سنگھ اروڑہ نے ایل جی ایف کی جانب سے منعقدہ کانفرنس ’’وہ بولتی ہے، وہ قیادت کرتی ہے، وہ تبدیلی لاتی ہے‘‘میں بطور مہمان خصوصی شرکت کی۔ کانفرنس میں سابق صوبائی وزیر اعجاز عالم آگسٹین، ایم پی اے بابا فیلبوس، شکیل جاوید، ایمونیئل اطہر اور دیگر بھی موجود تھے جبکہ کانفرنس میں پنجاب بھر سے 200 سے زائد مسیحی خواتین پیشہ ور افراد نے شرکت کی تاکہ قیادت، وکالت اور سماجی تبدیلی کو فروغ دیا جا سکے۔

کانفرنس میں اہم مذہبی، سیاسی اور سول سوسائٹی کے رہنماؤں نے بھی شرکت کی، جن میں بشپ ندیم کامران (رائٹ ریو. بشپ آف لاہور ڈایوسیس، چرچ آف پاکستان) اور دیگر شامل تھے۔ کانفرنس میں گفتگو کا محور خواتین کی قیادت میں شرکت، سیاست میں ان کا کردار بڑھانے اور کمیونٹیوں میں سماجی تبدیلی کی تحریک تھی۔

(جاری ہے)

کانفرنس سے خطاب کرتے ہوئے صوبائی وزیر برائے اقلیتی امور رمیش سنگھ اروڑہ نے کانفرنس کی اہمیت پر زور دیتے ہوئے کہا، ''یہ کانفرنس مسیحی خواتین کے لیے ایک شاندار پلیٹ فارم ہے جہاں وہ اپنے تجربات شیئر کر سکتی ہیں اور قیادت اور تبدیلی کی سمت میں اہم قدم اٹھا سکتی ہیں۔

وزیراعلی پنجاب مریم نواز کی زیر قیادت پنجاب حکومت خواتین کو، خصوصاً محروم کمیونٹیوں کی خواتین کو، بااختیار بنانے کی کوششوں میں بھرپور تعاون فراہم کرنے کے لیے پرعزم ہے، کیونکہ خواتین کی آوازیں معاشرتی ترقی کی بنیاد ہیں اور ہمیں ایسے مواقع فراہم کرنے ہوں گے جو ان آوازوں کو بلند کریں۔سابق صوبائی وزیر اعجاز عالم آگسٹین نے اپنے خطاب میں کہا کہ یہ پلیٹ فارم مسیحی خواتین کی آوازوں کو بلند کرے گا، ان کی کامیابیوں کو سراہا جائے گا اور آنے والی نسلوں کو قیادت کے لیے متاثر کیا جائے گا۔

ہم اس بات پر فخر محسوس کرتے ہیں کہ ہم ایسی فضا فراہم کر رہے ہیں جہاں یہ خواتین آپس میں ملاقات کر کے سیکھیں اور اپنے تجربات شیئر کریں، تاکہ ان کی آوازیں سنی جائیں اور ان کے کردار کو تسلیم کیا جائے۔ ایل جی ایف کی چیف ایگزیکٹو آفیسر، مہرناز جاوید نے اپنے خطاب میں کانفرنس کی اہمیت پر روشنی ڈالتے ہوئے پنجاب میں اقلیتی حقوق اور خواتین کی طاقت کو فروغ دینے بارے اہمیت پر زور دیا۔ کانفرنس کے اختتام پر صوبائی وزیر اقلیتی امور رمیش سنگھ اروڑہ کو ایک یادگاری شیلڈ پیش کی گئی۔