چودھری شافع حسین اور بلال یاسین کا داتا دربار کا دورہ ،ڈی جی اوقاف و مذہبی امور کا پر جوش استقبال

بدھ 26 مارچ 2025 21:10

لاہور (اُردو پوائنٹ اخبارتازہ ترین - اے پی پی۔ 26 مارچ2025ء) صوبائی وزیر اوقاف ومذہبی امور چودھری شافع حسین اور وزیر ہاوسنگ اینڈ اربن ڈویلپمنٹ بلال یاسین نے داتا دربار کا دورہ کیا ۔ ڈی جی اوقاف و مذہبی امور خالد محمود سندھو نے صوبائی وزرا کا استقبال کیا ۔ صوبائی وزرا چودھری شافع حسین اور وزیر ہاوسنگ اینڈ اربن ڈویلپمنٹ بلال یاسین نے داتا دربار حاضری دی اور چادر چڑھائی ۔

اس موقع پر پاکستان کی ترقی ،خوشحالی اور سلامتی کیلئے خصوصی دعائیں کی گئیں ۔ صوبائی وزرا نے داتا دربار توسیعی پراجیکٹ پر پیش رفت کا جائزہ لیا ۔ڈائریکٹرپراجیکٹس اوقاف نے صوبائی وزرا کو جاری تعمیراتی کاموں بارے بریفنگ دی ۔ چوہدری شافع حسین نے اس موقع پر گفتگو کرتے ہوئے کہا کہ 17کنال اراضی واگزار کرواکرمزار کے احاطے کو وسعت اور سرکلر روڈ کی ری ڈیزائننگ کی جارہی ہے ۔

(جاری ہے)

صوبائی وزیر نے ہدایت کی کہ داتا دربار کے توسیعی پراجیکٹ پر کام کی رفتار تیز کی جائے ۔صوبائی وزیر نے بتایا کہ صوبہ بھر میں مساجد اور مزارات کی تزئین و آرائش کا کام جاری ہے ۔ صوبائی وزیر نے محکمہ اوقاف ومذہبی امور کی اگلے سالانہ ترقیاتی پروگرام کی سکیموں کو جلد حتمی شکل دینے کی ہدایت کی ۔ انہوں نے داتا دربار کے تعمیراتی کاموں پر زیرو ٹالیرینس، بروقت اور معیاری تکمیل یقینی بنانے کی بھی ہدایت کی ۔صوبائی وزیر ہاوسنگ واربن ڈیولپمنٹ بلال یاسین نے کہا کہ زائرین کی بڑھتی تعداد کے پیش نظر داتا دربار کی توسیع ازحد ضروری تھی۔انہوں نے بتایا کہ مدینہ منورہ کی طرز پر کنوپیز کی تنصیب سے دربار کی خوبصورتی میں مزید اضافہ ہوا ۔