ہمارے پاس اختیار ہے نہ وسائل ہیں، ایسی گورنری کا فائدہ نہیں، آخر کب تک بدنامی اپنے نام لیں، گورنر سندھ

مئیر صاحب میں اب کوئی جواب نہیں دوں گا لیکن تمہیں اللّٰہ کو جواب دینا ہے کیوں کہ تمہیں منصب اللّٰہ نے دیا ہے، میئر کراچی اب تم جانو اور تمھارا رب جانے؛ تقریب میں خطاب اور میڈیا سے گفتگو

ساجد علی جمعرات 27 مارچ 2025 12:19

ہمارے پاس اختیار ہے نہ وسائل ہیں، ایسی گورنری کا فائدہ نہیں، آخر کب ..

کراچی ( اُردو پوائنٹ اخبارتازہ ترین۔ 27 مارچ 2025ء ) گورنر سندھ کامران خان ٹسوری نے کہا ہے کہ مجھے اگر گورنر شپ سے ہٹانا ہے تو ہٹادو کیوں کہ ایسے شہر میں گورنر رہنے کا کیا فائدہ جہاں روزانہ لوگ اور شیرخوار بچے ٹینکروں اور ڈمپروں کے نیچے کچلے جا رہے ہوں۔ گورنر ہاوس میں تقریب سے خطاب کرتے ہوئے انہوں نے کہا کہ ہمارے پاس اختیار ہے نہ وسائل ہیں، ایسی گورنری کا فائدہ نہیں، آخر کب تک بدنامی اپنے نام لیں، مئیر صاحب میں تمہیں اب کوئی جواب نہیں دوں گا لیکن تمہیں اللّٰہ کو جواب دینا ہے کیوں کہ تمہیں منصب اللّٰہ نے دیا ہے، میئر کراچی اب تم جانو اور تمھارا رب جانے۔

بعد ازاں ملیر ہالٹ میں میڈیا سے گفتگو کرتے ہوئے انہوں نے کہا کہ کراچی میں ٹریفک کی صورتحال بے حد خراب ہو چکی ہے، دنیا میں آنے سے پہلے ہی بچوں کو کچلا جا رہا ہے قاتل ڈمپر ہنستے بستے خاندانوں کو اجاڑ رہے ہیں، اس کا فوری تدارک ضروری ہے، سندھ حکومت اور انتظامیہ ہر صورت قوانین پر عملدرآمد کرائیں تاکہ ٹریفک کی بے ہنگم صورتحال کو روکا جا سکے، اگر ٹریفک قوانین پر عملدرآمد کا آغاز نہ ہوا تو وہ ڈمپروں کے سامنے کھڑے ہو کر احتجاج کریں گے جیسا کہ انہوں نے پہلے بھی کہا تھا کہ اگر ان ڈمپرز کو روکا نہ گیا تو باہر نکل کر ان کے سامنے آؤں گا۔

(جاری ہے)

گورنر سندھ نے کہا کہ ٹریفک گردی ایک سنگین مسئلہ ہے، اگر اس پر قابو نہ پایا گیا تو حادثات کا سلسلہ جاری رہے گا، کراچی لاوارثوں کا شہر نہیں ہے، اس لیے اس مسئلے پر سیاست نہ کی جائے، سیاست الزام تراشی کے لیے نہیں بلکہ عوام کے حقوق کے لیے ہونی چاہیئے، میں نے کہہ دیا ہے آج کے بعد میئر کراچی کو جواب نہیں دوں گا، جواب اللہ کو دینا ہے، سارے الزامات گورنر پر اور تم کیا بری الزمہ ہو؟ آواز اٹھانے پر میرا مذاق اُڑاتے ہیں اور اختیارات یاد دلاتے ہیں، میری بات کو سنجیدہ لیا جاتا تو نقصان نہیں ہوتا، آپ کو مجھے گورنر کے عہدے سے ہٹانے کا اختیار ہے جاؤ ہٹا دو لیکن آپ میری آواز بند نہیں کروا سکتے۔