امن وامان کی ناقص صورتحال کے باعث نماز عید الفطر اور دیگر اجتماعات میں خود سیکورٹی کا خیال رکھیں، مولانا فضل الرحمن

اتوار 30 مارچ 2025 20:51

اسلام آباد (اُردو پوائنٹ اخبارتازہ ترین - این این آئی۔ 30 مارچ2025ء)جے یو آئی سربراہ مولانا فضل الرحمان نے کہا ہے کہ امن وامان کی ناقص صورتحال کے باعث نماز عید الفطر اور دیگر اجتماعات میں خود بھی سیکورٹی کا خیال رکھیں اور انتظامیہ کے ساتھ بھرپور تعاون کریں ۔اپنے پیغام میں انہوںنے کہاکہ عید الفطر کے اس پر مسرت موقع پر اہل وطن اور امت مسلمہ کو مبارکباد پیش کرتاہوں ۔

اللہ کریم بار بار ہمیں یہ خوشیاں نصیب فرمائے ،ہماری عبادات کو شرف قبولیت عطا فرمائے ۔انہوںنے کہاکہ اس مبارک مہینے اور عید کی اس خوشی کے موقع پر بھی طن عزیز اور دنیا کے مختلف مقامات پر ہمارے مسلمان بھائی،بہنیں ،بزرگ اور بچے دکھ اور تکلیف میں ہیں ،انہیں دشمنوں کی جانب سے مسلسل اذیتیں دی جارہی ہیں، خصوصا غزہ کے مسلمانوں پر اسرائیلی بربریت رمضان کے مقدس مہینے میں بھی جاری رہیں ۔

(جاری ہے)

انہوںنے کہاکہ مسلمانوں کو حضور نبی کریم ﷺ نے جسد واحد قرار دیا ہے اور جسم کا کوئی حصہ تکلیف میں ہو تو پورا جسم اس تکلیف کو محسوس کرتا ہے ۔ انہوںنے کہاکہ اس وقت دنیا میں جہاں مسلمان تکلیف میں ہیں ہم ان کی تکلیف کو محسوس کرتے ہیں ۔ انہوںنے کہاکہ خوشی کے اس موقع پر اپنے گرد وپیش ضرورتمندوں ، فقرا اور حاجتمندوں کی ضروریات کا خیال رکھیں کہ یہی ہمارے پیارے دین کی تعلیمات ہیں ۔

اس رمضان المبارک میں ہمارے بہت سے علما کرام اور جماعتی رہنماں کی شہادتوں کے روح فرسا واقعات پیش آئے ، عید کے موقع پر شہدا کے ایصال ثواب کے لئے قرآن خوانی کا اہتمام کیا جائے ۔انہوںنے کہاکہ امن وامان کی ناقص صورتحال کے باعث نماز عید الفطر اور دیگر اجتماعات میں خود بھی سیکورٹی کا خیال رکھیں اور انتظامیہ کے ساتھ بھرپور تعاون کریں ۔انہوںنے کہاکہ بے جا اخراجات اور اسراف سے بچتے ہوئے سادگی سے عید منائیں ۔