سٹی ٹریفک پولیس پشاور کی تجاوزات مافیا کے خلاف کارروائیاں، 75 افراد گرفتار

جمعرات 3 اپریل 2025 10:40

پشاور (اُردو پوائنٹ اخبارتازہ ترین - اے پی پی۔ 03 اپریل2025ء) سٹی ٹریفک پولیس پشاور نے تجاوزات مافیا کے خلاف کارروائیوں کے دوران 75 افراد کوگرفتار کرکے جرمانے عائد کئے اور نو پارکنگ زون کی خلاف ورزیوں پر 38 موٹر سائیکل مالکان کے خلاف کارروائی کی۔ چیف ٹریفک آفیسر پشاور ہارون رشید خان کی نگرانی میں سٹی ٹریفک پولیس پشاور کی جانب سے تجاوزات مافیا کو رضا کارانہ طور پر تجاوزات ختم کرنے اور نو پارکنگ زون کی خلاف ورزی نہ کرنے بارے آگاہی کا سلسلہ جاری ہے جبکہ خلاف ورزی کرنے والوں کے خلاف شہر کے تمام سیکٹرز میں کارروائیاں کی گئی ہیں جس کے تحت تجاوزات قائم کرنے پر 75 افراد کو گرفتار کرکے مجسٹریٹ کے سامنے پیش کیا گیاجن پر جرمانے عائد کئے گئے۔

اسی طرح خوشحال بازار، سرکی گیٹ اور نمک منڈی میں نو پارکنگ زون کی خلاف ورزی پر 38 موٹر سائیکل مالکان کے خلاف کارروائی کی گئی ہے۔

(جاری ہے)

چیف ٹریفک آفیسر نے کہا ہے کہ سٹی ٹریفک پولیس پشاور قانونی تقاضوں کو پورا کرتے ہوئے تجاوزات مافیا کو پہلے نوٹس جاری کرتی ہے اور اس کے بعد آپریشن کرکے تجاوزات قائم کرنے والے افراد کو گرفتار کیا جاتا ہے۔

انہوں نے کہا کہ تجاوزات مافیا شہر کی خوبصورتی کا خاص خیال رکھتے ہوئے اپنی حدود سے تجاوز نہ کریں اور شہریوں کے لئے کسی قسم کی مشکلات پیدا کرنے سے گریز کریں۔ انہوں نے مزید کہا کہ تجاوزات کی وجہ سے شہر کی خوبصورتی متاثر ہوتی ہے جو کسی صورت قابل قبول نہیں۔ چیف ٹریفک آفیسر نے مزید کہا کہ تجاوزات قائم کرنےوالوں کے خلاف قانونی کارروائی عمل میں لائی جائےگی اور کسی کے ساتھ کوئی نرمی نہیں برتی جائے گی۔

انہوں نے کہا کہ شہری نو پارکنگ زون کی خلاف ورزی نہ کریں جس سے ٹریفک نظام میں خلل سمیت شہریوں کو مشکلات کا سامنا کرنا پڑتا ہے جبکہ خلاف ورزی کے مرتکب افراد کسی رعایت کے مستحق نہیں ہیں۔ انہوں نے ٹریفک حکام کو ہدایت کی کہ وہ ٹریفک قوانین کی خلاف ورزی کرنے والوں کےخلاف قانون کے مطابق کارروائی عمل میں لائیں۔