سینئرصوبائی وزیرمریم اورنگزیب کا نیو ٹاؤن تھانے اور ہولی فیملی ہسپتال کا اچانک دورہ

جمعہ 4 اپریل 2025 19:28

لاہور (اُردو پوائنٹ اخبارتازہ ترین - آن لائن۔ 04 اپریل2025ء) سینئر صوبائی وزیر مریم اورنگزیب نے نیو ٹاؤن تھانے اور ہولی فیملی ہسپتال راولپنڈی کا بغیر اطلاع اچانک دورہ کیا۔ دورے کے دوران وزیر اعلیٰ پنجاب کی ہدایت پر مختلف شعبوں میں بہتری کے لیے متعدد احکامات جاری کیے گئے۔نیو ٹاؤن تھانے کے دورے میں مریم اورنگزیب نے تھانے کو سمارٹ پولیس اسٹیشن بنانے کی ہدایت جاری کی۔

انہوں نے تھانے میں مینجمنٹ انفارمیشن سسٹم (MIS) کی تنصیب، ٹوکن سسٹم کے آغاز، اور عوام کی رہنمائی کے لیے نشانات کی تنصیب کا حکم دیا۔ خواتین کے لیے علیحدہ اور بہتر انتظامات کی ضرورت پر زور دیتے ہوئے انہوں نے ہوا اور روشنی کی فراہمی، عمارت کی مرمت، رنگ و روغن اور داخلی راستوں کی صفائی کے اقدامات کی ہدایت بھی دی۔

(جاری ہے)

بعدازاں، سینئر صوبائی وزیر نے ہولی فیملی ہسپتال کا دورہ کیا، جہاں انہوں نے ایمرجنسی وارڈ میں بستروں کی تعداد بڑھانے کے احکامات جاری کیے۔

وزیر اعلیٰ پنجاب کی ہدایت پر چار میں سے دو بند آپریشن تھیٹرز کو فوری فعال کرنے کی بھی تاکید کی گئی تاکہ مریضوں کی سرجریز میں کسی قسم کی تاخیر نہ ہو۔ہسپتال میں صفائی کی صورتحال، ادویات کی فراہمی، اور علاج معالجے کی سہولیات کا تفصیلی جائزہ لیا گیا۔ مفت ادویات کی فراہمی کی ریکارڈنگ بند ہونے پر انہوں نے برہمی کا اظہار کیا اور ہدایت دی کہ عوام کو واضح طور پر آگاہ کیا جائے کہ ادویات مفت فراہم کی جا رہی ہیں۔

فارمیسی کے باہر ادویات کی تفصیل الیکٹرانک سکرین پر دکھانے کی بھی ہدایت جاری کی گئی۔وزیرِ اعلیٰ پنجاب کی جانب سے مجموعی طور پر بہتر انتظامات پر ڈاکٹروں اور عملے کو شاباش دی گئی، جبکہ مریم اورنگزیب نے ہیلپ لائن اور ریکارڈنگ کے نظام پر عدم فعالیت پر متعلقہ عملے کو وارننگ جاری کی۔