ایف آئی اے نے سمندر کے راستے شہریوں کو یورپ بھجوانے میں ملوث ریڈ بک کے انتہائی مطلوب ملزم سمیت 3 ایجنٹ گرفتار کر لئے

جمعہ 4 اپریل 2025 22:30

اسلام آباد (اُردو پوائنٹ اخبارتازہ ترین - اے پی پی۔ 04 اپریل2025ء) فیڈرل انوسٹی گیشن ایجنسی (ایف آئی اے) نے سمندر کے راستے شہریوں کو یورپ بھجوانے میں ملوث ریڈ بک کے انتہائی مطلوب ملزم سمیت 3 ایجنٹ گرفتار کر لئے۔ ایف آئی اے ترجمان کے مطابق ایف آئی اے گوجرانوالہ زون نے بڑی کارروائیاں کرتے ہوئے انسانی سمگلنگ میں ملوث عناصر کے خلاف گھیرا تنگ کر لیا جس میں سمندر کے راستے شہریوں کو یورپ بھجوانے میں ملوث ریڈ بک کے انتہائی مطلوب انسانی سمگلرز سمیت 3 ایجنٹ کو گرفتار کر لیا گیا۔

ملزمان کی شناخت محمد عمران، محمد تنویر اور غلام غوث کے نام سے ہوئی ہے ، ان ملزمان کو گوجرانوالہ اور گجرات کے مختلف علاقوں سے گرفتار کیا گیا۔ گرفتار ملزم محمد عمران نے شہریوں سمندر کے راستے اسپین بھجوانے کے لیے 72 لاکھ روپے سے زائد وصول کیے تھے۔

(جاری ہے)

ملزم نے شہریوں کو کشتی کے ذریعے غیر قانونی طور پر موریطانیہ سے اسپین سمگل کرنے کی کوشش کی ۔

شہریوں نے کشتی کے ذریعے سفر سے انکار کر دیا اور واپس پاکستان آگئے جبکہ گرفتار ملزم محمد تنویر سال 2019 سے اشتہاری ہے ۔ ملزم کا نام ریڈ بک کے انتہائی مطلوب انسانی سمگلرز میں شامل ہے ، ملزم کے خلاف متعدد مقدمات درج ہیں ۔ملزم نے شہریوں کو ترکی کے راستے یورپ بھجوانے کے لیے لاکھوں روپے ہتھیائے جبکہ ملزم غلام غوث نے شہری کو غیر قانونی طریقے سے یونان بھجوانے کی غرض سے 17 لاکھ روپے سے زائد ہتھیائے ۔

ملزمان شہریوں کو بیرون ملک بھجوانے میں ناکام رہے اور روپوش ہو گئے ۔ ترجمان نے بتایا کہ ملزمان کو گرفتار کر کے تفتیش کا آغاز کر دیا گیا۔ ڈائریکٹر گوجرانوالہ زون عبدالقادر قمر نے بتایا کہ انسانی سمگلنگ کے نیٹ ورک کے خلاف کارروائیاں مزید تیز کر دی گئی ہیں، معصوم جانوں سے کھیلنے والوں کو انصاف کے کٹہرے میں لایا جائے گا۔ عبدالقادر قمر نے بتایا کہ انسانی سمگلنگ کے خلاف زیرو ٹالرنس پالیسی پر عمل جاری ہے ، کشتی حادثات کے ذمہ دار انسانی سمگلروں کو سخت سزائیں دلوائی جائیں گی، بین الاقوامی سطح پر انسانی سمگلنگ کے نیٹ ورک کو جڑ سے ختم کیا جائے گا۔