نیوزی لینڈ نے پاکستان کیخلاف ون ڈے سیریز میں کلین سویپ مکمل کرلیا

آخری میچ میں گرین شرٹس کو 43 رنز سے شکست، بابر اعظم کی ففٹی بھی رائیگاں

ذیشان مہتاب ہفتہ 5 اپریل 2025 11:47

نیوزی لینڈ نے پاکستان کیخلاف ون ڈے سیریز میں کلین سویپ مکمل کرلیا

ماؤنٹ مونگا نوئی (اردو پوائنٹ تازہ ترین اخبار ۔ 5 اپریل 2025ء ) نیوزی لینڈ نے تیسرے اور آخری ون ڈے میں پاکستان کو 43 رنز سے شکست دیکر سیریز میں کلین سویپ مکمل کرلیا۔

ماؤنٹ مونگا نوئی میں کھیلے جارہے میچ کو بارش کے باعث 42 اوورز تک محدود کردیا گیا ۔

پاکستان نے ٹاس جیت کر فیلڈنگ کا فیصلہ کیا اور میزبان ٹیم نے ایک بار پھر جارحانہ انداز میں کھیلتے ہوئے مقررہ اوورز میں 8 وکٹوں پر 264 رنز بنائے، کپتان مائیکل بریسویل 59 رنز بناکر نمایاں رہے جبکہ اوپنر ریس ماریو 58 رنز کے ساتھ دوسرے نمایاں بلے باز رہے۔

پاکستان کی جانب سے عاکف جاوید 4 وکٹوں کے ساتھ سرفہرست رہے، نسیم شاہ نے دوکھلاڑیوں کو آؤٹ کیا جب کہ فہیم اشرف اور سفیان مقیم کے حصے میں ایک، ایک وکٹ آئی۔

(جاری ہے)

ہدف کے تعاقب میں گرین شرٹس کی ٹیم 40 اوورز میں 221 رنز بناکر آل آؤٹ ہوگئی، پاکستان کی اننگز کا آغاز ایک مرتبہ پھر مایوس کُن رپا، اوپنر امام الحق اور عبداللہ شفیق نے اننگز کا آغاز کیا تو امام ایک رن بناکر فیلڈر کی گیند لگنے کے باعث انجری کا شکار ہوکر ریٹائر ہرڈ ہوگئے، اوپنر عبداللہ شفیق 33 رنز بناکر آؤٹ ہوئے۔

دیگر کھلاڑیوں میں سلمان آغا 11، عثمان خان 12، کپتان محمد رضوان 37، طبیب طاہر 33، نسیم شاہ 17، فہیم اشرف 3، محمد وسیم جونئیر صفر پر پویلین لوٹے جب کہ بابر اعظم نے 50 رنز کی اننگز کھیلی۔

نیوزی لینڈ کی جانب سے بین سیئرز نے 5، جیکب ڈفی 2 جبکہ محمد عباس اور ڈیرل مچل نے ایک ایک وکٹ حاصل کی۔