پاکستان ،کینیڈا کے دو طرفہ سیاسی، اقتصادی، سرمایہ کاری، تجارتی ،ثقافتی تعلقات میں اضافہ کے وسیع تر امکانات موجود ہیں،محمد سلیم

ہفتہ 5 اپریل 2025 17:10

اسلام آباد (اُردو پوائنٹ اخبارتازہ ترین - اے پی پی۔ 05 اپریل2025ء) کینیڈا کے دارالحکومت اوٹاوامیں پاکستان کے ہائی کمشنر محمد سلیم نے کہا ہے کہ پاک، کینیڈا کے درمیان دوستانہ اور پائیدار تعلقات پر زور دیتے ہوئے دو طرفہ سیاسی، اقتصادی، سرمایہ کاری، تجارتی اور ثقافتی تعلقات میں اضافہ کے وسیع تر امکانات موجود ہیں۔ہفتہ کو یہاں موصولہ ایک پریس ریلیز میں کہا گیا کہ ہائی کمشنر نے کہا کہ کینیڈا گزشتہ سال پاکستان میں سرمایہ کاری کرنے والے سرفہرست پانچ ممالک میں شامل تھا ۔

انہوں نے کاروباری برادری پر زور دیا کہ وہ کان کنی، آئی ٹی، زراعت، توانائی اور انفراسٹرکچر کے شعبوں میں سرمایہ کاری میں اضافہ کریں۔انہوں نے اپنے ورثے کے ساتھ مضبوط تعلقات کو برقرار رکھتے ہوئے کینیڈا کے متنوع معاشرے کی ترقی کے لیے سرکاری اور نجی شعبوں میں نمایاں شراکت کے لیے متحرک پاکستانی-کینیڈین باشندوں کی بھی تعریف کی۔

(جاری ہے)

ان خیالات کا اظہار ہائی کمشنر محمد سلیم نے پاکستانی ہائی کمیشن اوٹاوا میں یوم پاکستان کے سلسلے میں منعقدہ استقبالیہ سے خطاب کر تے ہوئے کیا ۔

تقریب میں مہمانوں بشمول کینیڈین معززین، اعلیٰ حکومتی عہدیداران، سفارتی کور کے ارکان، بین الاقوامی تنظیموں، کاروباری برادری، تعلیمی نمائندوں، میڈیا، سول سوسائٹی، پاکستانی کمیونٹی اور طلبا نے شرکت کی۔اپنے خطاب میں ہائی کمشنر نے یوم پاکستان کی اہمیت پر زور دیا جو قائد اعظم محمد علی جناح کے وژن اور پاکستان کے بانی قائدین کی قربانیوں سے تشکیل پانے والے ملک کے سفر کی عکاسی کرتا ہے۔

انہوں نے گزشتہ سال کے دوران پاکستان میں ہونے والی حوصلہ افزا اقتصادی پیش رفت پر بھی روشنی ڈالی اور کلیدی اصلاحات، بہتر مالیاتی انتظام اور سرمایہ کاروں کے اعتماد میں اضافے کے ذریعے استحکام اور ترقی کو اجاگر کیا۔محمد سلیم نے کہا کہ زرمبادلہ کے ذخائر مستحکم ہوئے ہیں جبکہ ترسیلات زر اور برآمدات میں بھی اضافہ ہوا ہے جس سے ملک کی اقتصادی لچک میں اضافہ ہوا ہے۔ہائی کمشنر نے امن، خوشحالی اور شمولیت کے لیے پاکستان کے عزم کا اعادہ کیا اور تمام شعبوں میں پاکستان اور کینیڈا کے تعلقات کو گہرا کرنے کی اہمیت پر زور دیا۔