Live Updates

عوام گھروں میں بیٹھ کر ٹیکس فائل کرسکیں گے، کسی وکیل کی ضرورت نہیں ہوگی

ٹیکسیشن کے امور آسان بنا رہے ہیں، ٹیکس سسٹم میں شفافیت لانے کے لیے انسانی مداخلت کم سے کم کرکے ٹیکنالوجی کے ذریعے ٹرانسپیرنٹ سسٹم متعارف کروانا ضروری ہے، وفاقی وزیر خزانہ

محمد علی ہفتہ 5 اپریل 2025 18:44

عوام گھروں میں بیٹھ کر ٹیکس فائل کرسکیں گے، کسی وکیل کی ضرورت نہیں ہوگی

اسلام آباد (اُردو پوائنٹ اخبارتازہ ترین۔ 05 اپریل2025ء) وفاقی وزیر خزانہ نے کہا ہے کہ اب تمام پاکستانی تنخواہ دار شہری گھروں میں بیٹھ کر ٹیکس فائل کرسکیں گے، کسی وکیل کی ضرورت نہیں ہوگی، ٹیکسیشن کے امور آسان بنا رہے ہیں، ٹیکس سسٹم میں شفافیت لانے کے لیے انسانی مداخلت کم سے کم کرکے ٹیکنالوجی کے ذریعے ٹرانسپیرنٹ سسٹم متعارف کروانا ضروری ہے۔

تفصیلات کے مطابق وفاقی وزیر خزانہ محمد اورنگزیب کی جانب سے تنخواہ دار طبقے کیلئے ٹیکس فائل کرنے کا نظام آسان بنانے کے حوالے سے اہم اعلان کیا گیا ہے۔ ہفتہ کے روز میڈیا سے گفتگو کرتے ہوئے وزیر خزانہ نے کہا کہ تنخواہ دار طبقے کو ٹیکس فارم کے حوالے سے مشورہ دیا جاتا ہے کہ آپ نان ایپلی کیبل کر دیں کہ آپ پر ٹیکس کا اطلاق نہیں ہوتا، حالاں کہ کیسے ٹیکس ایڈوائزر سے مشورہ کیے بغیر ہم یہ لکھ سکتے ہیں؟ ٹیکس کے وکلا اور مشیروں کو احترام کے ساتھ عرض کرتا ہوں کہ اس جانب توجہ دیں۔

(جاری ہے)

انہوں نے کہا کہ ٹیکس سسٹم میں شفافیت لانے کے لیے انسانی مداخلت کم سے کم کرکے ٹیکنالوجی کے ذریعے شفاف سسٹم متعارف کروانا ضروری ہے، ایک بار ٹیکس جمع کرنے سے کام نہیں چلے گا، ٹیکس کلیکشن کی پائیداری کو برقرار رکھنے کے لیے اقدامات کرنے ہوں گے۔ وزیر خزانہ نے کہا کہ آئی ایم ایف کا وفد گورننس کے ایشو پر پاکستان آیا ہے، آئی ایم ایف کا وفد بجٹ پر بات چیت نہیں کرے گا، آئی ایم ایف کے ساتھ گورننس کے لیے اہداف پہلے سے طے ہیں۔

جبکہ امریکا کے ساتھ ٹیرف کے بعد پیدا ہونے والی نئی صورت حال پر بات چیت کے لیے اعلی سطح کا وفد امریکا جائے گا، امریکی ٹیرف کے بعد امریکا سے بات چیت کا نیا پیکج تیار کر رہے ہیں، امریکی ٹیرف کے بعد اسٹئیرنگ کمیٹی بنائی گئی ہے، امریکا کے ٹیرف لگانے کے بعد ورکنگ گروپ بنایا گیا ہے۔