عوام پر ٹیکسوں کا بوجھ ڈالنے والی حکومت نے 100 سے زائد اداروں کو ٹیکس چھوٹ دے دی

وفاقی حکومت کی جانب سے آئندہ مالی سال کیلئے پاکستان بار کونسل، صوبائی بار کونسلز، فوجی فاؤنڈیشن، آرمی ویلفیئر ٹرسٹ سمیت درجنوں اداروں کو ٹیکس سے استثنٰی دے دیا گیا

محمد علی پیر 30 جون 2025 18:40

لاہور (اُردو پوائنٹ اخبارتازہ ترین۔ 30 جون2025ء)عوام پر ٹیکسوں کا بوجھ ڈالنے والی حکومت نے 100 سے زائد اداروں کو ٹیکس چھوٹ دے دی، وفاقی حکومت کی جانب سے آئندہ مالی سال کیلئے پاکستان بار کونسل، صوبائی بار کونسلز، فوجی فاؤنڈیشن، آرمی ویلفیئر ٹرسٹ سمیت درجنوں اداروں کو ٹیکس سے استثنٰی دے دیا گیا۔ تفصیلات کے مطابق شہباز شریف حکومت کی جانب سے عوام خاص کر تنخواہ دار طبقے پر رواں مالی سال کے دوران ریکارڈ توڑ ٹیکسوں کا بوجھ ڈالا گیا۔

میڈیا رپورٹس کے مطابق حکومت نے صرف تنخواہ دار طبقے کی جیبوں سے رواں مالی سال کے دوران انکم ٹیکس کی مد میں 600 ارب روپے سے زائد نکالے، جبکہ حکومت کاروباری طبقے خاص کر دکانداروں سے کوئی نمایاں ٹیکس حاصل کرنے میں ایک مرتبہ پھر ناکام رہی۔

(جاری ہے)

جبکہ یہ انکشاف بھی ہوا ہے کہ حکومت نے آئندہ مالی سال کے دوران درجنوں اداروں کو انکم ٹیکس چھوٹ بھی دے دی ہے۔

بتایا گیا ہے کہ قومی اسمبلی سے فنانس بل اور انکم ٹیکس آرڈیننس کی منظوری کے بعد حکومت نے 107 اداروں کو انکم ٹیکس کی چھوڑ دے دی ۔ انکم ٹیکس آرڈیننس 2001 میں ترمیم کے ذریعے107 اداروں کو ٹیکس چھوٹ دے دی گئی ہے۔ پاکستان بار کونسل سمیت صوبائی بار کونسلز، فوجی فاؤنڈیشن، آرمی ویلفیئر ٹرسٹ، فاؤنڈیشن یونیورسٹی کو انکم ٹیکس کی چھوٹ دے دی گئی۔

الشفاء ٹرسٹ، شفاء ٹرسٹ آئی ہسپتال کے ساتھ ساتھ دیگر کچھ فلاحی ہسپتالوں کو بھی ٹیکس چھوٹ دے دی گئی، فارمن کرسچن کالج، لمز، غلام اسحاق خان یونیورسٹی کو بھی ٹیکس استثنیٰ حاصل ہوگیا۔ انکم ٹیکس آرڈیننس کے تحت تخفیف غربت فنڈ، نیشنل رورل سپورٹ پروگرام، نینشل انڈومنٹ اسکالر شپ، ایف بی آر فاؤنڈیشن، پاکستان زرعی ریسرچ کونسل، آڈٹ اوورسائٹ بورڈ کو ٹیکس چھوٹ دی گئی ہے۔ اس کے علاوہ سابق صدور اوران کی بیواؤں کی پنشن میں بھی ٹیکس استثنیٰ اور سپریم کورٹ دیامیر بھاشا و مہمند ڈیم فنڈ کو بھی انکم ٹیکس کی چھوٹ دی گئی ہے۔