ڈی پی او چارسدہ کامختلف تھانوں کا دورہ،سیکیورٹی انتظامات کاجائزہ لیا

پیر 7 اپریل 2025 13:34

پشاور (اُردو پوائنٹ اخبارتازہ ترین - اے پی پی۔ 07 اپریل2025ء) ڈی پی او چارسدہ سلیمان ظفرنےمختلف تھانوں کا دورہ کیا ،دورہ کا مقصد سیکیورٹی انتظامات کا جائزہ لینا تھا ۔ ترجمان چارسدہ پولیس کے مطابق ڈسٹرکٹ پولیس آفیسر چارسدہ سلیمان ظفر نے تھانہ پڑانگ اور تھانہ سرڈھیری کا دورہ کیا۔ دورے کا مقصد مذکورہ تھانوں میں مجموعی سیکیورٹی صورتحال، ریکارڈ کی درستگی، سی سی ٹی وی سسٹم، حوالات اور مالخانہ کا معائنہ کیا۔

انہوں نے تھانوں میں سی سی ٹی وی کیمروں کی فنکشنل حیثیت، ریکارڈ روم، روزنامچہ، مقدمات کی تفتیش سے متعلق امور کا بھی معائنہ کیا۔انہوں نے حوالات میں موجود سہولیات، صفائی کی صورتحال کابھی جائزہ لیا۔ تھانوں میں آنے والے سائلین سے ملاقات کے دوران ان کے مسائل سنے اور فوری نوعیت کی شکایات پر موقع پر احکامات جاری کیے۔

(جاری ہے)

دورے کے دوران پولیس افسران اور اہلکاروں کے ساتھ بریفنگ سیشن میں موجودہ سیکیورٹی چیلنجز، عوامی توقعات اور پولیسنگ کے جدید تقاضوں پر گفتگو کی گئی۔

ڈی پی او نے اہلکاروں کو ہدایت کی کہ وہ عوامی خدمت کو اپنی اولین ترجیح بنائیں، تھانے کو عوام کے لیے آسان اور انصاف کا مرکز بنائیں اور غفلت کسی صورت برداشت نہیں کی جائے گی۔انہوں نے کہا کہ پولیس کا ہر آفیسر اور جوان قانون کی بالادستی، شفافیت اور عوامی اعتماد کے اصولوں پر کاربند رہے۔ اچانک دوروں کا سلسلہ مستقبل میں بھی جاری رہے گا تاکہ تھانوں میں بہتر نظم و نسق اور شفافیت کو یقینی بنایا جا سکے۔