لائنز انٹرنیشنل کلب کے زیر اہتمام رنگا رنگ عید ملن پارٹی کا انعقاد، سماجی شخصیات کی بھرپور شرکت، انسانیت کی خدمت کے جذبے کو سراہا گیا

پیر 7 اپریل 2025 17:53

راولپنڈی (اُردو پوائنٹ اخبارتازہ ترین - اے پی پی۔ 07 اپریل2025ء) لائنز انٹرنیشنل کلب کے زیراہتمام سبطین لودھی اور افتخار احمد کی خصوصی کاوشوں سے ایک خوبصورت اور شاندار عید ملن پارٹی کا انعقاد آرٹ کونسل راولپنڈی میں کیا گیا۔ اس پروقار تقریب میں معزز سماجی و مذہبی شخصیات نے بھرپور شرکت کی۔مہمانان خصوصی میں معروف سماجی شخصیت سیدہ سمیرا رضا ، سید امیر حسین الحسینی ہمدانی ، نعیم اکرم قریشی ، جمال چستی ، علامہ آغا، احسان الدین کبریا اور دیگر معزز مہمان شامل تھے۔

تمام مہمانوں کا پرتپاک استقبال کیا گیا۔تقریب کا آغاز سید امیر حسین الحسینی ہمدانی نے تلاوت کلام پاک سے کیا۔ بعد ازاں سبطین لودھی صاحب اور افتخار احمد نے لائنز انٹرنیشنل کلب کی تاریخ اور خدمات پر روشنی ڈالی۔

(جاری ہے)

انہوں نے بتایا کہ اس کلب کی بنیاد 1917ء میں امریکہ میں رکھی گئی اور 1920ء میں کینیڈا میں اس کا دائرہ پھیلا۔ آج پاکستان میں اس کے 20 سے زائد فعال کلب خدمات انجام دے رہے ہیں۔

لائنز کلب کا بنیادی مقصد انسانیت سے محبت، خدمت خلق، حسن اخلاق کو فروغ دینا اور مستحق افراد کے چہروں پر خوشیاں بکھیرنا ہے۔مذہبی شخصیت علامہ آغا نے اپنے خطاب میں خدمت انسانیت کو دین کا اہم جزو قرار دیا جبکہ سید امیر حسین الحسینی ہمدانی نے لائنز کلب کی خدمات کو سراہتے ہوئے کہا کہ انسانیت کی خدمت ہی اصل عبادت ہے۔تقریب میں نعیم اکرم قریشی نے اپنے خیالات کا اظہار کرتے ہوئے ماحول کو پرجوش بنایا جبکہ یوتھ کی نمائندگی شہباز حیدر نے کی جن کی محنت کو خصوصی طور پر سراہا گیا۔