مولانا فضل الرحمن کا 13 اپریل کو کراچی میں اسرائیل مردہ باد مظاہرے کا اعلان

منگل 8 اپریل 2025 23:19

پشاور (اُردو پوائنٹ اخبارتازہ ترین - این این آئی۔ 08 اپریل2025ء)جمعیت علماء اسلام (جے یو آئی) ف کے سربراہ مولانا فضل الرحمن نے کہا ہے کہ 13 اپریل کو کراچی میں اسرائیل مردہ باد مظاہرہ ہو گا۔ایک بیان میں انہوں نے کہا ہے کہ غزہ کے مسلمانوں پر جو بیت رہی ہے یا بیت چکی ہے وہ تاریخ کے صفحات پر سیاہ دھبوں کے سوا کچھ نہیں، اسرائیل نے امن معاہدہ توڑ کر غزہ پر شب خون مارا ہے، وہاں شیر خوار بچے زندگی اور موت کی کشمکش میں تڑپ رہے ہیں۔

مولانا فضل الرحمن نے کہا کہ نیتن یاہو جنگی مجرم ہے، اسے عالمی عدالتِ انصاف نے گرفتار کرنے کا حکم دیا ہے، غزہ میں نہ ادویات ہیں، نہ کھانے پینے کی کوئی چیز لیکن مسلمان حکمراں خاموش ہیں، جرم کرنے والے اور اس جرم پر خاموش رہنے والے برابر کے مجرم تصور کیے جائیں گے۔

(جاری ہے)

انہوںنے کہاکہ کہ اسلامی دنیا کا حکمراں امریکا اور مغرب کے سامنے جھک رہا ہے، امتِ مسلمہ آج بھی ایک صف میں ہے لیکن حکمراں جذبات کی ترجمانی نہیں کر رہے، گریٹر اسرائیل کی طرف بڑھتے قدموں سے کوئی عرب ملک نہیں بچ سکے گا۔

سربراہ جے یو آئی نے کہا کہ امتِ مسلمہ اپنے ملکوں میں اپنے حکمرانوں پر سیاسی دبائو بڑھائے، 10 اپریل کو تمام مکاتبِ فکر کا کنونشن منعقد کرنے کا فیصلہ کیا گیا ہے، کنونشن میں مشترکہ حکمتِ عملی اور موقف اپنایا جائے گا۔