صنعتی کارکنان کو سستی رہائش اور معیاری انفراسٹرکچر کی فراہمی حکومت کی اولین ترجیح ہے ،چوہدری سالک حسین

بدھ 9 اپریل 2025 13:47

اسلام آباد (اُردو پوائنٹ اخبارتازہ ترین - اے پی پی۔ 09 اپریل2025ء) وفاقی وزیر برائے سمندر پار پاکستانی و ترقی انسانی وسائل چوہدری سالک حسین نے کہا ہے کہ صنعتی کارکنان کو سستی رہائش اور معیاری انفراسٹرکچر کی فراہمی موجودہ حکومت کی اولین ترجیح ہے ۔ان خیالات کا اظہار انہوں نے ورکرز ویلفیئر فنڈ کی جانب سے تعمیر شدہ لیبر کمپلیکس میں بجلی کی فراہمی کے منصوبے کا افتتاح کرتے ہوئے کیا ۔

اس موقع پر سیکرٹری ورکرز ویلفیئر فنڈ ذوالفقار احمد بھی وفاقی وزیر کے ہمراہ تھے۔ بدھ کو وزارت برائے سمندر پار پاکستانیز سے جاری بیان کے مطابق چوہدری سالک حسین نے کہا کہ اس طرح کے منصوبوں سے صنعتی کارکنان کو سستی اور معیاری سہولت کے ساتھ ساتھ بہترین ماحول بھی میسر آئے گا۔

(جاری ہے)

انہوں نے کہا کہ حکومت پاکستان صعنتی کارکنان کے فلاحی منصوبوں کو آگے بڑھائے گی اوران کی بہتری کیلئے تمام ترحکومتی وسائل بروئے کار لائے جائیں گے۔

انہوں نے ہدایت کی کہ مستحق اور اہل مزدوروں اور کارکنان کو تعمیر شدہ مکانات اور اپارٹمنٹس کی جلد الاٹمنٹ کی جائے۔وفاقی وزیر نے مزید کہا کہ لیبر کمپلیکس فیز 2 کا بھی جلد از جلد آغاز کیا جائے تاکہ زیادہ سے زیادہ صعنتی کارکنان رہائشی سہولت سے مستفید ہو سکیں ۔اس موقع پر سیکرٹری ورکرز ویلفیئر فنڈ ذوالفقار احمد نے وفاقی وزیر کو منصوبے کے حوالے سے بریفنگ دیتے ہوئے اس عزم کا اعادہ کیا کہ ورکرز ویلفیئر فنڈ صعنتی کارکنان کے شانہ بشانہ کھڑا ہے اور حکومتی پالسیوں کو مد نظر رکھتے ہوئے انہیں تمام بنیادی سہولیات کی فراہمی کو یقینی بنایا جائے گا. اور فیز ٹو رہائشی منصوبے میں بین الاقوامی طرز کی تمام سہولتوں کو فراہم کیا جائے گا ۔

تقریب کے آخر میں سیکرٹری ورکرز ویلفیئر فنڈ نے وفاقی وزیر کو یادگاری شیلڈ بھی پیش کی۔ وفاقی وزیر چوہدری سالک حسین نے سیکرٹری ورکرز ویلفیئر فنڈ کے ہمراہ1500سے زائد تعمیر شدہ گھروں فلیٹس،کمیونٹی سنٹر اور مسجد کا دور کیا اور سیکرٹری ورکرز ویلفیئر فنڈ اور ان کی ٹیم کی کاوشوں کو سراہا۔