ابوظہبی میں یوم پاکستان کی مناسبت سے استقبالیہ ، سفیر فیصل ترمذی نے قرار داد پاکستان کی اہمیت کو اجاگر کیا

ابوظہبی (اُردو پوائنٹ اخبارتازہ ترین - اے پی پی۔ 09 اپریل2025ء) متحدہ عرب امارات میں پاکستان کے سفیر فیصل نیاز ترمذی نے کہا ہے کہ پاکستان نے سماجی و اقتصادی ترقی کے فروغ میں نوجوانوں کی بڑی تعداد ،عوامی زندگی میں خواتین کی بڑھتی ہوئی شراکت، زراعت ، متنوع ثقافتی ورثہ،سیاحت کی صلاحیتیں اور تیزی سے ترقی کرتا ہوا آئی ٹی سیکٹر اہم کردار ادا کررہا ہے۔

متحدہ عرب امارات(یو اے ای) میں پاکستان کے سفارت خانے نے یوم پاکستان کی مناسبت سےاستقبالیہ کا اہتمام کیا جس میں سفارتکاروں، یو اے ای حکومت کے اعلیٰ حکام، اماراتی شہریوں اور پاکستانی برادری نے بھی شرکت کی۔ متحدہ عرب امارات کے رواداری اور بقائے باہمی کے وزیر شیخ نہیان بن مبارک النہیان تقریب کےمہمان خصوصی تھے جبکہ وزیر مملکت برائے خارجہ اموراحمد بن علی الصیغ نے بھی تقریب میں شرکت کی۔

(جاری ہے)

بدھ کو یہاں موصولہ پریس ریلیز کے مطابق تقریب کے آغاز پر پاکستانی فنکاروں نے روایتی بینڈ پر پاکستان اور متحدہ عرب امارات کے قومی ترانے بجائے۔ اس موقع پر خطاب کرتے ہوئے سفیر فیصل نیاز ترمذی نے قرارداد پاکستان کی اہمیت کو اجاگر کیا اور ایک نوزائیدہ ریاست کی بڑھتی ہوئی ضروریات سے نمٹنے اور بعد میں سماجی و اقتصادی ترقی کے حصول کے لئے سخت جدوجہد پر روشنی ڈالی۔

انہوں نے پاکستان میں ایسے متعدد مواقع کی طرف توجہ دلائی جو ملک میں سماجی و اقتصادی ترقی کو فروغ دینے میں کلیدی حیثیت رکھتے ہیں جن میں صحت مند نوجوانوں کی بڑی تعداد ، عوامی زندگی میں خواتین کی بڑھتی ہوئی شرکت، زراعت کی صلاحیت ، متنوع ثقافتی ورثہ، سیاحت کی صلاحیت، اور سب سے تیزی سے ترقی کرنے والا آئی ٹی سیکٹر شامل ہیں ۔ انہوں نے اس بات پر زور دیا کہ حکومت ایک ترقی پسند ایجنڈے پر عمل پیرا ہے جس کا مقصد اقتصادی ترقی اور پائیدار ترقی کے اہداف کے حصول کے لئے ٹھوس پیش رفت کرنا ہے۔

انہوں نے غزہ میں جنگ کے فوری خاتمے اورمذاکرات کی فوری ضرورت پر زور دیتے ہوئے مسئلہ فلسطین اور جموں و کشمیر کے تنازع کے حل کے لیے اقوام متحدہ کی سلامتی کونسل کی قراردادوں کے مطابق پاکستان کے موقف کی توثیق کی۔ سفیرفیصل ترمذی نے گزشتہ پانچ دہائیوں میں متحدہ عرب امارات کی متاثر کن اقتصادی ترقی کا اعتراف کیا اور مرحوم شیخ زید بن سلطان النہیان کی دور اندیش قیادت کو زبردست خراج تحسین پیش کرتے ہوئے کہا کہ اس کوموجودہ صدر شیخ محمد بن زید النہیان نے فخر کے ساتھ جاری رکھا۔

انہوں نے کہا کہ پاکستان اور متحدہ عرب امارات کی بڑھتی ہوئی مضبوط سیاسی اور اقتصادی شراکت داری کا مظاہرہ باقاعدہ اعلیٰ سطحی رابطوں، اچھی طرح سے قائم اداروں اور 17 لاکھ پاکستانیوں کی موجودگی سے ہوتا ہے۔ متحدہ عرب امارات کے بانی کو خراج تحسین پیش کرنے کے لئے سفارت خانے نے شیخ زید بن سلطان مرحوم کی زندگی اور کاموں پر ایک کتاب کا اجراء بھی کیا جس کا عنوان ’’شیخ زید ،معمار وطن‘‘ ہے اور اسے ایک ممتاز پاکستانی خان زمان سرور نے تحریر کیا ہے۔ یہ کتاب پاکستانی کمیونٹی کی جانب سے یو اے ای کے عوام اور حکومت کو خراج تحسین ہے۔ اس موقع پر پاکستان کے ممتاز کاروباری شخصیات میں سے ایک عدنان نیاز کو ان کی شاندار خدمات پر ستارہ امتیاز سے بھی نوازا گیا۔\932