پی ایس ایل10، احسان اللہ نے پشاور زلمی کی کٹ پہن لی ، تصویر وائرل

وائرل تصویر میں فاسٹ بولر کو پشاور زلمی کی جرسی زیب تن کیے دیکھا جاسکتا ہے، قیاس آرائیاں شروع

ذیشان مہتاب بدھ 9 اپریل 2025 13:12

پی ایس ایل10، احسان اللہ نے پشاور زلمی کی کٹ پہن لی ، تصویر وائرل

پشاور (اردو پوائنٹ تازہ ترین اخبار ۔ 9 اپریل 2025ء ) پاکستان کے نوجوان فاسٹ بولر احسان اللہ کی پشاور زلمی کی کٹ پہنے تصویر سوشل میڈیا پر وائرل ہوگئی۔

فاسٹ بولر احسان اللہ کی وائرل تصویر نے ان کی پشاور زلمی میں منتقل ہونے کے بارے میں قیاس آرائیوں کو جنم دیا جس میں زلمی کی جرسی پہنے ہوئے ہیں۔احسان اللہ نے پی ایس ایل 2023ء میں ملتان سلطانز کی جانب سے کھیلتے ہوئے 22 وکٹیں حاصل کی تھیں جس کے بعد مارچ 2023ء میں پاکستان کے لیے ٹی 20 انٹرنیشنل میں ڈیبیو کیا۔

انہیں اپریل 2023ء میں نیوزی لینڈ کے خلاف ون ڈے ڈیبیو کے دوران کہنی کی انجری ہوئی اور وہ کرکٹ سے دور ہوگئے جب وہ 2024ء میں چیمپئنز ٹی کپ کھیلنے آئے تو ملتان سلطانز نے رواں سال کے شروع میں منعقدہ پی ایس ایل 10 کے ڈرافٹ میں انہیں منتخب نہیں کیا جس کے بعد احسان اللہ نے ریٹائرمنٹ کا اعلان کردیا تاہم چند گھنٹے بعد ہی انہوں نے ریٹائرمنٹ واپس لے لی۔

(جاری ہے)

بعد ازاں انہوں نے ملتان سلطانز سے معذرت کرتے ہوئے کہا کہ وہ جب بھی انہیں بلائیں گے وہ حاضر ہوں گے، تاہم اب زلمی کی کٹ پہنے ان کی تصویر کی قیاس آرائیوں کو جنم دیا ہے۔ وائرل تصویر میں احسان اللہ کو پشاور زلمی کی جرسی زیب تن کیے دیکھا جاسکتا ہے۔

پی ایس ایل فرنچائز نے وائرل تصویر کے بارے میں کوئی باضابطہ بیان جاری نہیں کیا تاہم رپورٹ کے مطابق انہوں نے زلمی کے تربیتی کیمپ میں شمولیت اختیار کی ہے۔