الیکشن افسران آئین اور قانون کے مطابق فرائض کی انجام دہی ایمانداری سے کریں‘چیف الیکشن کمشنر

اسلام آباد (اُردو پوائنٹ اخبارتازہ ترین - آن لائن۔ 09 اپریل2025ء) چیف الیکشن کمشنر سکندر سلطان راجہ نے الیکشن افسران پر زور دیا ہے کہ وہ آئین اور قانون کے مطابق اپنے فرائض کی انجام دہی ایمانداری سے کریں ان خیالات کا اظہار انہوں نے الیکشن کمیشن میں نئے تعینات الیکشن افسران کی ٹریننگ کے آغاز کے موقع پر کیا ترجمان الیکشن کمیشن کے مطابق الیکشن کمیشن نے 23نئے تعینات الیکشن افسران (بی ایس-17) کے لیے 13 ہفتوں پر مشتمل سروس ٹریننگ کا آغاز کردیا ہے۔

اس تربیتی پروگرام کا اختتام 4 جولائی 2025 کو ہوگا۔چیف الیکشن کمشنر سکندر سلطان راجہ نے اس تربیتی پروگرام کا باقاعدہ افتتاح کیا۔ اس افتتاحی تقریب میں معزز ممبران الیکشن کمیشن بھی شریک ہوئے۔ چیف الیکشن کمشنر نے اپنے افتتاحی کلمات میں نئے افسران کو الیکشن کمیشن میں تعیناتی پرمبارکباد دی اور خوش آمدید کہا انہوں نے افسران پر واضح کیا کہ اُنکا انتخاب خالصتاً میرٹ کی بنیاد پر ہوا ہے اور اس پر اُنکو فخر ہونا چاہئے۔

(جاری ہے)

انہوں نے کہا کہ انتخابات کا انعقاد ایک مشکل اورپیچیدہ عمل ہے جس کے موثر انعقاد کیلئے آئین،قانون،رولز،کوڈ آف کنڈکٹ کی جانکاری اور عملی تجربہ ضروری ہے۔ اس تربیتی پروگرام میں آپ کو انتخابی قوانین، حلقہ بندیوں، ووٹر رجسٹریشن،پولنگ کے طریقہ کار ودیگر دفتری امورکی انجام دہی سے متعلق تربیت دی جائے گی اور جہاں تک ممکن ہوگا عملی تجربات ومظاہرہ جات بھی کروائے جائیں گے۔

افسران کو انتخابی قوانین، ووٹر رجسٹریشن اور پولنگ سکھائی جائے گی‘جدید ٹیکنالوجی کے استعمال پر بھی تربیت دی جائے گی‘افسران کو عملی مظاہرے بھی کروائے جائیں گے۔ مزید اس دوران افسران کو جدید ٹیکنالوجی کے استعمال کے متعلق بھی آگاہی فراہم کی جائے گی تاکہ دوران سروس اور عملی زندگی میں ٹیکنا لوجی کو استعمال کرسکیں۔ اختتامی الفاظ میں چیف الیکشن کمشنر نے نئے افسران کو قوم کی خدمت،آئین وقانون کے مطابق سرکاری امور کی انجام دہی اور عوام کے ساتھ خوش اخلاقی سے پیش آنے کی تلقین کی اور ٹریننگ پر توجہ مذکور کرنے پر زور دیا۔۔۔۔۔ اعجاز خان