دبئی دنیا کے امیر ترین افراد کیلئے ایک ابھرتا ہوا مرکز بن گیا

گزشتہ 10سال کے دوران دبئی میں کروڑ پتی افراد کی تعداد میں 102 فیصد اضافہ ہوا ہے،رپورٹ

جمعہ 11 اپریل 2025 14:51

دبئی دنیا کے امیر ترین افراد کیلئے ایک ابھرتا ہوا مرکز بن گیا

ابوظہبی (اُردو پوائنٹ اخبارتازہ ترین - این این آئی۔ 11 اپریل2025ء)متحدہ عرب امارات کی ریاست دبئی بلند و بالا عمارتوں اور الٹرا لگژری لائف اسٹائل کی وجہ سے دنیا بھر میں شہرت رکھتی ہے مگر اب گزشتہ 10 سال کے دوران دبئی کی طرف کروڑ پتی افراد کھینچے چلے آرہے ہیں اور ان کی تعداد میں مسلسل اور تیزی سے اضافہ ہو رہا ہے۔میڈیارپورٹس کے مطابق عالمی ریسرچ ادارے نیو ورلڈ ویلتھ کی رپورٹ میں کہاگیاکہ دبئی دنیا کے تیزی سے بڑھتے ہوئے دولت کے مراکز میں سے ایک بن چکا ہے۔

رپورٹ میں بتایا گیا ہے کہ گزشتہ 10سال کے دوران دبئی میں کروڑ پتی افراد کی تعداد میں 102 فیصد اضافہ ہوا ہے۔ 2024 میں دبئی میں 81 ہزار 200کروڑ پتی، 237 سینٹی ملینئر اور 20 ارب پتی مقیم ہیں، جبکہ 2014 میں 40ہزار کروڑ پتی، 212 سینٹی ملینئر اور 15 ارب پتی افراد دبئی میں بستے تھے۔

(جاری ہے)

رپورٹ کے مطابق، سینٹی ملینئر وہ شخص ہوتا ہے جس کی دولت کم از کم 100 ملین امریکی ڈالر یا اس سے زیادہ ہو۔

دبئی میں اس وقت 237 سینٹی ملینئرز موجود ہیں۔نیو ورلڈ ویلتھ نے اپنی تجزیاتی رپورٹ میں کہا کہ دبئی کی کم ٹیکس پالیسی، محفوظ ماحول، اور مضبوط معیشت دنیا بھر کے امیر افراد کو اپنی طرف متوجہ کر رہی ہے۔ دبئی کاروبار شروع کرنے اور سرمایہ کاری کے لیے ایک مثالی جگہ بن چکا ہے۔رپورٹ میں مزید بتایا گیا کہ دبئی کا جدید انفراسٹرکچر، اعلی معیار کی صحت، تعلیم اور تفریحی سہولیات دبئی کو امیر افراد کے لیے ایک پرکشش مقام بناتی ہیں۔

2024 میں لندن سے 11 ہزار 300 کروڑ پتی افراد نقل مکانی کر گئے، جس کی وجہ برطانیہ کے نئے ٹیکس قوانین بتائے گئے ہیں۔نیو ورلڈ ویلتھ نے رپورٹ میں واضح کیا ہے کہ جب لندن اور برطانیہ دولت مندوں کو ٹیکسوں کے اضافے سے دور کر رہے ہیں، دبئی اس کے برعکس راستہ اختیار کر رہا ہے۔ماہرین کو توقع ہے کہ مزید برطانوی افراد اور کاروبار مستقبل میں دبئی کا رخ کریں گے۔