پی ایس ایل 10 کوئٹہ گلیڈی ایٹرز نے پشاور زلمی کو شکست دیدی

راولپنڈی(اُردو پوائنٹ اخبارتازہ ترین - این این آئی۔ 12 اپریل2025ء)پاکستان سپر لیگ(پی ایس ایل)کے دسویں ایڈیشن کے دوسرے میچ میں کوئٹہ گلیڈی ایٹرز نے پشاور زلمی کو 80 رنز سے شکست دے دی، کپتان سعود شکیل اور فن ایلن کی نصف سنچریوں کی بدولت مقررہ 20 اوورز میں 3 وکٹوں کے نقصان پر 216 رنز بنائے،جواب میں پشاور زلمی کے 5 کھلاڑی کھاتہ کھولے بغیر پویلین واپس چلے گئے ،صائم ایوب کے سوا کوئی بھی بلے باز زیادہ دیر وکٹ پر نہ رک سکا اور پوری ٹیم 20 اوورز بھی نہ کھیل سکی،13.1اوور میں پشاور زلمی کی پوری ٹیم 136 رنز پر ڈھیر ہوگئی، کوئٹہ کے ابرار احمد مین آف دی میچ قرار پائے۔

راولپنڈی کرکٹ اسٹیڈیم میں ہونے والے پی ایس ایل 10 کے دوسرے میچ میں کوئٹہ گلیڈی ایٹرز نے پہلے بیٹنگ کرتے ہوئے کپتان سعود شکیل اور فن ایلن کی نصف سنچریوں کی بدولت مقررہ 20 اوورز میں 3 وکٹوں کے نقصان پر 216 رنز بنائے تاہم 217 رنز کے بڑے ہدف کے تعاقب میں صائم ایوب کے سوا کوئی بھی بلے باز زیادہ دیر وکٹ پر نہ رک سکا اور پوری ٹیم 20 اوورز بھی نہ کھیل سکی، 13.1اوور میں پشاور زلمی کی پوری ٹیم 136 رنز پر ڈھیر ہوگئی۔

(جاری ہے)

ہدف کے تعاقب میں پشاور زلمی کو پہلے ہی اوور میں کپتان بابراعظم کی وکٹ کی صورت میں دھچکا لگا جو کھاتہ کھولے بغیر ہی محمد عامر کا شکار بن گئے۔تیسرے نمبر پر بیٹنگ کے لیے آنے والے محمد حارث بھی 13 رنز کے مہمان ثابت ہوئے، ٹام کولر کیڈ مور بھی کھاتہ کھولے بغیر پویلین لوٹ گئے جبکہ اوپننگ بلے باز صائم ایوب اپنی نصف سنچری مکمل کرنے کے بعد 50 رنز پر ہی آئوٹ ہوگئے۔

آل رائونڈر حسین طلعت 35 رنز بناکر آئوٹ ہوئے، میکس برائنٹ، الزاری جوزف اور صفیان مقیم صفر پر آئوٹ ہوئے۔ مچل اوون نے 13 گیندوں پر 31 رنز کی جارحانہ اننگز کھیلی لیکن وہ ان کی ٹیم کے لیے ناکافی ثابت ہوئی۔کوئٹہ گلیڈی ایٹرز کی جانب سے ابرار احمد نے 4، محمد عامر اور عثمان طارق نے 2،2 کھلاڑیوں کو آئوٹ کیا جبکہ ایک وکٹ کائل جمیسن کے حصے میں آئی۔

اس سے قبل، پشاور زلمی کے کپتان بابراعظم نے کوئٹہ گلیڈی ایٹرز کے خلاف ٹاس جیت کر پہلے فیلڈنگ کرنے کا فیصلہ کیا۔کوئٹہ گلیڈی ایٹرز کو فن ایلن اور سعود شکیل نے جارحانہ آغاز فراہم کیا، فن ایلن 4 چھکوں اور 5 چوکوں کی مدد سے 25 گیندوں پر 53 رنز بنانے کے بعد آئوٹ ہوئے۔تیسرے نمبر پر بیٹنگ کے لیے آنے والے حسن نواز 41 رنز بناکر آئوٹ ہوئے جب کہ کپتان سعود شکیل نے 42 گیندوں پر 59 رنز کی اننگز کھیلی جس میں 2 چھکے اور 6 چوکے شامل تھے۔

ریلی روسو نے 10 گیندوں پر 21 اور کشال مینڈس نے 14 گیندوں پر 35 رنز کی جارحانہ اننگز کھیلی اور دونوں ناٹ آئوٹ رہے۔پشاور زلمی کی جانب سے محمد علی سب سے مہنگے بالر ثابت ہوئے جنہوں نے 4 اوورز میں 57 رنز دئیے۔ علی رضا، صفیان مقیم اور الزاری جوزف نے ایک ایک وکٹ حاصل کی۔واضح رہے کہ پاکستان سپر لیگ 10 کے افتتاحی میچ میں اسلام آباد یونائیٹڈ نے کولن منرو کی ناقابل شکست نصف سنیچری کی بدولت لاہور قلندرز کو 8 وکٹوں سے شکست دی تھی۔