پشاور، طلبہ کو نقل کی فراہمی اور نقل میں معاونت کرنے پرسپرنٹنڈنٹ ، ڈپٹی سپرنٹنڈنٹ اور دو ممتحن ڈیوٹی سے فارغ،تاحیات بورڈ ڈیوٹی کےلیے نااہل

ہفتہ 12 اپریل 2025 21:40

پشاور (اُردو پوائنٹ اخبارتازہ ترین - اے پی پی۔ 12 اپریل2025ء) کمشنر پشاور ڈویژن و چیئرمین پشاور تعلیمی بورڈ ریاض خان محسود نے میٹرک امتحان کے دوران زریاب کالونی پشاور میں طلبہ کو نقل کی فراہمی اور نقل میں معاونت کرنے پر سپرنٹنڈنٹ، ڈپٹی سپرنٹنڈنٹ اور دو ممتحن کو ڈیوٹی سے فارغ کرکے تاحیات بورڈ ڈیوٹی کے لیے نااہل کر دیا۔ کمشنر پشاور ڈویژن کے دفتر سے جاری بیان کے مطابق میٹرک کے امتحان میں شفافیت برقرار رکھنے، نقل کی روک تھام اور طلبہ کو سہولیات کی فراہمی کے حوالے سے اسسٹنٹ کمشنر پشاور شہروز مفتی نے چیئرمین پشاور تعلیمی بورڈ کو رپورٹ کرتے ہوئے بتایا کہ 12 اپریل کو ان کے اچانک دورے کے دوران علاقہ زریاب کالونی میں قائم اسکول رائل اسکول میں طلبہ سرعام نقل کرتے ہوئے پائے گئے۔

(جاری ہے)

ڈیوٹی پر مامور امتحانی عملہ اور اسکول انتظامیہ ملکر طلبہ کو نقل میں مدد فراہم کررہے تھے۔ اس موقع پر طلبہ سے بڑی مقدار پاکٹ گائیڈز اور دیگر مواد برآمد کیا گیا۔ کمشنر پشاور ڈویژن و چیئرمین پشاور تعلیمی بورڈ ریاض خان محسود نے اسسٹنٹ کمشنر پشاور کی رپورٹ پر شدید برہمی کا اظہار کرتے ہوئےسپرنٹنڈنٹ محمد عقیل، ڈپٹی سپرنٹنڈنٹ محمود خان، ممتحن حماد خان اور ممتحن محمد ساجد کو فوری طور پر فارغ کرنے، تاحیات امتحانی ڈیوٹی کےلیے بلیک لسٹ کرنے اور باقاعدہ انکوائری کرکے ای اینڈ ڈی رولز کے تحت سخت کارروائی اور تعلیمی بورڈ انتظامیہ کو فوری طور پر متبادل امتحانی عملہ مذکورہ امتحانی ہال میں تعینات کرنے کے احکامات جاری کیے۔

کمشنر پشاور ڈویژن و چیئرمین پشاور تعلیمی بورڈ ریاض خان محسود نے واضح کیا کہ نقل کی روک تھام کے سلسلے میں کوئی کوتاہی برداشت نہیں کی جائے گی۔ خلاف ورزی کرنے والے سخت ترین تادیبی کارروائی کےلیے اپنے آپ کو تیار رکھیں۔