یو ای ٹی لاہور کا 31واں کانووکیشن، 2ہزار 676طلباء میں اسناد تقسیم

لاہور (اُردو پوائنٹ اخبارتازہ ترین - این این آئی۔ 14 اپریل2025ء)یونیورسٹی آف انجینئرنگ اینڈ ٹیکنالوجی لاہور کا 31واں کانووکیشن منعقد ہوا جس میں مرکزی اور ذیلی کیمپسز کے 2ہزار 676طلبا میں اسناد تقسیم کی گئیں۔ جن میں 1ہزار 847انڈر گریجویٹ، 7سو 64ایم ایس سی/ایم فل اور 65پی ایچ ڈی کی ڈگریاں شامل ہیں۔ اس دوران شاندار کارکردگی دکھانے والے 46طلبا میں 71طلائی تمغے بھی تقسیم کئے گئے جن میں الیکٹریکل انجینئرریحان قاسم اور کیمیکل انجینئر عائشہ خرم نی6,6گولڈ میڈل حاصل کئے۔

کانووکیشن کی صدارت گورنر پنجاب و چانسلر یو ای ٹی سردار سلیم حیدر خان نے کی۔ وائس چانسلر ڈاکٹر شاہد منیر نے خطبہ استقبالیہ پیش کیا اور یونیورسٹی کی تدریسی و تحقیقی میدان میں کامیابیوں کے ساتھ ساتھ مستقبل کی منصوبہ بندی اور اہداف بیان کئے۔

(جاری ہے)

انہوں نے کہا کہ یو ای ٹی کے گریجویٹس پاکستان کا اثاثہ ہیں، ملک کی تعمیر و ترقی میں ان کا کردار نمایاں ہے۔

انہوں نے کامیاب طلبا و طالبات کو مبارکباد پیش کرتے ہوئے کہا کہ یہ سب آپ کے والدین اور اساتذہ کی محنت کا نتیجہ ہے ہمیشہ والدین اور اساتذہ کا احترام کریں۔ اس موقع پر گفتگو کرتے ہوئے گورنر پنجاب نے کامیاب طلبا کو مبارکباد پیش کی اور کہا کہ یو ای ٹی اور انجینئرنگ کا سفر ایک صدی پر محیط ہے،یونیورسٹی کے انجینئرز ہی کی بدولت آج وطن عزیز تیزی سے ترقی کر رہا ہے۔

انہوں نے یو ای ٹی کی بین الاقوامی اور ایشیا کی رینکنگ میں مسلسل بہتری کو سراہا، انہوں نے اس کا سہرا یونیورسٹی کے میرٹ پر تعینات وائس چانسلراور ان کی ٹیم کے سر باندھا۔ سردار سلیم حیدر خان نے ڈگریاں حاصل کر نیوالے طلبا سے اپیل کرتے ہوئے کہا کہ غر بت،پانی کے بحران،ماحولیاتی آلودگی اور قدرتی آفات جیسے اہم مسائل سے نمٹنے کے لیے پائیدار اقدامات کے لیے حکومت کیساتھ تعاون کر یں آئی ٹی کا شعبہ بھی پاکستان میں سماجی اور معاشی خوشحالی لانے کیلئے ایک غیر معمولی منافع بخش موقع ہے۔

سردار سلیم حیدر خان کا کہنا تھا کہ ہماری آبادی کا 60فیصد حصہ ہمارے نوجوان ہیں،آپ ہماری امید ہیں،آپ ہی نے ملک کو بنانا ہے۔ڈگریاں لینا اہم ہے،ریسرچ ورک کرنا بھی اہم ہے لیکن سب سے اہم آپکا کردار ہے جو آپ نے اپنی اگلی زندگی میں نبھانا ہے۔پہلے دنیا میں گرین پاسپورٹ کا بڑامقام تھا لیکن بد قسمتی سے آجکل صورتحال زیادہ اچھی نہیں ہے۔اس لئے ملک کی تعمیر و ترقی میں اپنا کردار ادا کریں اور پاکستان کو اسکا وہ مقام دلائیں جو ہونا چاہیے تھا،آپکے کردار سے نظر آئے آپ پاکستان کی عزت و وقار کا بھرم رکھنے والے لوگ ہیں،کانووکیشن میں شریک ڈگری حاصل کرنے والے طلبا و طالبات کے والدین اپنے بچوں کی کامیابی پر شاداں نظر آئے۔

کانووکیشن کے اختتام پر وائس چانسلر نے سردار سلیم حیدر خان کو یادگاری شیلڈ دی۔اختتامی لمحات میں طلبا نے اپنے گانز کی ٹوپیاں ہوا میں لہرا کر خوشی کا اظہار کیا۔کانووکیشن میں رجسٹرار،ممبران سینڈیکیٹ، مختلف فیکلٹیز کے ڈین،شعبہ جات کے سربراہوں، انتظامی افسران سمیت طلبا و طالبات کی بڑی تعداد نے شرکت کی۔