عالمی برادری فیکٹ فائنڈنگ مشن مقبوضہ کشمیر بھیجے ، زاہد ہاشمی

منگل 15 اپریل 2025 11:30

پیرس (اُردو پوائنٹ اخبارتازہ ترین - اے پی پی۔ 15 اپریل2025ء) انٹرنیشنل کشمیر پیس فورم فرانس کے صدر زاہد اقبال ہاشمی نے مقبوضہ جموں و کشمیر میں بھارتی قابض افواج کی طرف سے نہتے کشمیریوں پر ڈھائے جانے والے وحشیانہ مظالم کی شدید مذمت کی ہے۔کشمیر میڈیا سروس کے مطابق مقبوضہ کشمیر کی تازہ ترین صورتحال کے بارے میں میڈیا سے گفتگوکرتے ہوئے زاہد اقبال ہاشمی نے کہا کہ بھارتی حکومت خاص طورپر اگست2019کے بعد کشمیریوں کو وحشیانہ ظلم و بربریت کا نشانہ بنارہی ہے اور ان سے ان کے بنیادی حقوق چھین رہی ہے۔

(جاری ہے)

انہوں نے کہا کہ جموں وکشمیر کی خصوصی حیثیت جسے مودی حکومت نے اگست 2019میں منسوخ کر دیاتھا ،کی بحالی کشمیری عوام کی ترقی اور بہبود کے لیے ناگزیر ہے۔زاہد ہاشمی نے عالمی برادری پر زور دیا کہ وہ مقبوضہ جموں و کشمیر میں انسانی حقوق کی سنگین پامالیوں اور بین الاقوامی قوانین کی خلاف ورزیوں کا جائزہ لینے کے لیے ایک فیکٹ فائنڈنگ مشن مقبوضہ علاقے بھیجے۔انہوں نے مزید کہا کہ بھارت کے 24کروڑ سے زائد مسلمانوں نے متنازعہ وقف ایکٹ کو یکسر مسترد کر دیا ہے، کیونکہ یہ کسی بھی طرح سے ان کے حق میں نہیں ہے۔