ایسی ڈیل کرنا جانتے ہیں جس سے روس جال میں دوبارہ نہ پھنسے، سرگئی لاروف

یورپ چاہتا ہے کہ یوکرینی صدر زینسکی کی جگہ ایک نیا نیم ہٹلر تلاش کرے جو نسبتا کم انحصار کرے،انٹرویو

منگل 15 اپریل 2025 12:00

ماسکو(اُردو پوائنٹ اخبارتازہ ترین - این این آئی۔ 15 اپریل2025ء)روس کے وزیر خارجہ سرگئی لاروف نے کہا ہے کہ ماسکو جانتا ہے کہ امریکی صدر سے ایسی ڈیل کس طرح نہ کی جائے جس سے روس جال میں پھنس جائے۔غیرملکی خبررساں ادارے کے مطابق روسی وزیر خارجہ نے ایک انٹرویو میں کہا کہ روس کو نارمل ڈیل کی پیشکش کی گئی جسے ہم اچھے انداز سے دیکھ رہے ہیں۔

(جاری ہے)

انہوں نے کہا کہ روس مکمل طور پر سمجھتا ہے کہ فریقوں کے لیے فائدہ مند ڈیل کیسی ہوتی ہے، ایسی ڈیل کو روس نے کبھی مسترد نہیں کیا مگر ہم یہ بھی جانتے ہیں کہ وہ ڈیل کیسی نظر آتی ہے جو روس کو ایک اور جال میں پھانس سکتی ہو۔

روسی وزیر خارجہ کا کہنا تھا کہ واشنگٹن سے تعلقات کی بحالی کے بعد ماسکو کو چاہیے کہ وہ اقتصادی، تکنیکی، فوجی اور دیگر امور میں پھر سے انحصار نہ ہونے دے اور یہ وہ سبق ہے کہ جو روس سو فیصد نہیں بھولے گا۔ ایک سوال پر سرگئی لاروف نے کہا کہ یورپ چاہتا ہے کہ یوکرینی صدر زینسکی کی جگہ ایک نیا نیم ہٹلر تلاش کرے جو نسبتا کم انحصار کرے۔انہوں نے کہا کہ برطانیہ کے وزیراعظم اور فرانس کے صدر کی قیام امن کی اسکیموں کی بنیاد یہ ہے کہ زمین کا ایک ایسا ٹکڑا ہو جس پر نازی افراد روس کے خلاف اگلی جنگ کی تیاری کریں۔