ریٹائرڈ ملازمین کی پنشن بوگس پنشنرز کے نام نکلوانے کا انکشاف

کے ڈی اے میں 500 بوگس پنشنرز ثابت ہونے کے بعد ان کی پنشن بند

منگل 15 اپریل 2025 16:08

کراچی(اُردو پوائنٹ اخبارتازہ ترین - این این آئی۔ 15 اپریل2025ء)کراچی ڈیولپمنٹ اتھارٹی (کے ڈی ای)کے ریٹائرڈ اور انتقال کر جانے والے ملازمین کی بیواوں کی پنشن بوگس پنشرز کے نام سے نکلوانے کا انکشاف ہوا ہے۔

(جاری ہے)

میڈیا رپورٹ کے مطابق یہ انکشاف سندھ اسمبلی کی پبلک اکاونٹس کمیٹی کے اجلاس میں ہوا، اجلاس میں بتایا گیا کہ کراچی ڈیولپمنٹ اتھارٹی (کے ڈی ای)کے ریٹائرڈ اور انتقال کر جانے والے ملازمین کی بیواوں کی پنشن بوگس پنشنرز کے ذریعہ نکالی جاتی رہی ہے اور 2 ارب 21 کروڑ روپے کے پنشن فنڈز میں ماہانہ کروڑوں روپے بوگس پنشنرز کے نام سے نکلوائے گئے۔

اجلاس میں بتایا گیا کہ بوگس پنشنرز کے نام 667 ملین نکلوانے پر کے ڈی اے ڈائریکٹر فنانس کو معطل کیا گیا جب کہ پبلک اکاونٹس کمیٹی نے پنشن فنڈز میں گھپلوں کی تحقیقات ایف آئی اے کے حوالے کر دی ہیں۔سیکریٹری کے ڈی اے نے بتایا کہ ادارہ ہر ماہ 2 ارب سے زائد کا پنشن فنڈ جاری کرتا ہے اور متعلقہ بینک ہر 6 ماہ میں بائیو میٹرک تصدیق کرنے کے بعد متعلقہ فرد کی پنشن جاری رکھتا ہے۔ کے ڈی اے میں 500 بوگس پنشنرز ثابت ہوئے، جس کے بعد ان کی پنشن بند کر دی گئی۔