اسلام آباد ہائیکورٹ کے نئے ججز نے سب سے زیادہ مقدمات کے فیصلے کرکے اپنی قابلیت ثابت کردی

منگل 15 اپریل 2025 18:25

اسلام آباد (اُردو پوائنٹ اخبارتازہ ترین - آن لائن۔ 15 اپریل2025ء) اسلام آباد ہائیکورٹ کے نئے تعینات ہونے والے ججز نے پہلے سے موجود ججز کے مقابلے میں سب سے زیادہ مقدمات کے فیصلے کرکے اپنی قابلیت ثابت کردی۔قائم مقام چیف جسٹس سردار محمد سرفراز ڈوگر نے 178 درخواستیں نمٹا دیں، ایک اور نئے تعینات جج محمد اعظم خان نے 162 مقدمات کے فیصلے کیے۔ اسلام آباد ہائیکورٹ کی آفیشل ویب سائٹ پر دستیاب اعداد و شمار کے مطابق جسٹس راجہ انعام امین منہاس، جنہوں نے رواں سال جنوری میں عہدہ سنبھالا تھا، انہوں نے گزشتہ ماہ کے دوران 225 مقدمات کا فیصلہ کیا۔

قائم مقام چیف جسٹس سردار محمد سرفراز ڈوگر نے 178 درخواستیں نمٹا دیں، ایک اور نئے تعینات جج محمد اعظم خان نے 162 مقدمات کا فیصلہ سنایا۔

(جاری ہے)

سینئر ترین جج جسٹس محسن اختر کیانی نے 60، جسٹس طارق محمود جہانگیری نے 66، جسٹس بابر ستار نے 40، جسٹس سردار اعجاز اسحٰق خان نے 57، جسٹس ارباب محمد طاہر نے 85، جسٹس ثمن رفعت امتیاز نے 38، جسٹس خادم حسین سومرو نے 33 اور جسٹس محمد آصف نے 75 درخواستوں کا فیصلہ سنایا۔لاہور ہائیکورٹ سے جسٹس سرفراز ڈوگر، سندھ ہائیکورٹ سے جسٹس خادم حسین سومرو اور بلوچستان ہائیکورٹ سے جسٹس آصف کے تبادلے کے خلاف سینئر ترین ججز نے سپریم کورٹ میں درخواست دائر کی تھی۔