لاہور پولیس کی بجلی چوری کے خلاف کارروائیاں

بجلی چوری کی9530سے زائد ملزمان گرفتار،7770سے زائد مقدمات درج۔ ترجمان لاہور پولیس

منگل 15 اپریل 2025 19:34

لاہور (اُردو پوائنٹ اخبارتازہ ترین - آن لائن۔ 15 اپریل2025ء) لاہور پولیس کی جانب سے رواں سال بجلی چوری کے خلاف مختلف کارروائیوں میں9530سے زائد ملزمان کو گرفتارکر کی7770سے زائد مقدمات کا اندراج کیا گیا ہے۔یہ بات ترجمان لاہور پولیس نے آج یہاں جاری اپنے بیان میں کہی۔ترجمان نے بتایا کہ اقبال ٹاؤن ڈویژن میں بجلی چوری کی1207،صدر میں 1879، کینٹ میں 3040، ماڈل ٹاؤن میں 1874، سٹی میں 1095اور سول لائنز میں 438 ملزمان کو گرفتار کر کے مختلف تھانوں میں ان کے خلاف مقدمات کا اندراج کیا گیا ہے۔

سی سی پی او بلال صدیق کمیانہ نے کہا کہ ملکی وسائل کو نقصان پہنچانے والے قانون شکن عناصرکے خلاف زیرو ٹالرنس کارروائیاں جاری ہیں۔انہوں نے کہا کہ بجلی چوری کے تدارک کے لیے فیلڈ افسران متعلقہ محکموں کے ساتھ رابطہ استوار رکھیں۔

(جاری ہے)

بلال صدیق کمیانہ نے کہا کہ بجلی چوری کی شکایات پر بلا تاخیر کارروائی یقینی بنائی جائے۔انہوں نے کہا کہ بجلی چوری کے درج مقدمات میں ملزمان کی گرفتاریوں کو ہر صورت یقینی بنایا جائے۔

سی سی پی او لاہورنے بجلی چوری کے مقدمات کو یکسو کر کے چالان بروقت عدالتوں میں جمع کروانے کی ہدایات جاری کرتے ہوئے کہا کہ بجلی چوری میں ملوث عدالتی مفروران کی گرفتاری کے لیے خصوصی اقدامات اٹھائے جائیں۔بلال صدیق کمیانہ نے مزید کہا کہ سپروائزری افسران بجلی چوری کے مقدمات کی تفتیش پر خصوصی توجہ دیں۔