سعودی عرب ، مکہ پرمٹ کے لیے درخواستوں کی وصولی شروع

بدھ 16 اپریل 2025 09:00

ریاض (اُردو پوائنٹ اخبارتازہ ترین - اے پی پی۔ 16 اپریل2025ء) سعودی عرب محکمہ پاسپورٹ اینڈ امیگرین ’جوازت‘ نے کہا ہے کہ حج سیزن کے لیے ’مکہ پرمٹ‘ کے اجرا کی ابتدائی کارروائی کا آغاز کر دیا گیا ہے۔اخبار 24کے مطابق پرمٹ کے اجرا کے لیے انفرادی سطح پر ’ابشر‘ اور اداروں کی جانب سے کارکنوں کے لیے ’مقیم‘ پلیٹ فارم پر درخواست فارم بھر کے مطلوبہ دستاویزات جمع کرائی جا سکتی ہیں۔

محکمہ جوازات کا کہنا ہے کہ حج سیزن کے لیے ’مکہ پرمٹ ‘ کا اجرا یونیفائیڈ پورٹل ’تصریح‘ سے کیا جائے گا جسے وزارت داخلہ نے تمام اداروں سے مربوط کیا ہے۔’مکہ پرمٹ‘ کے لیے غیرملکی کارکن، گھریلو ملازمین، منفرد اقامہ ہولڈرز، سرمایہ دار، سعودی شہری کی والدہ اور جی سی سی ممالک کے شہری درخواست دے سکتے ہیں۔

(جاری ہے)

پرمٹ ایسے افراد کو جاری کیا جائے گا جو حج سیزن کے لیے مکہ میں پیشہ ورانہ امور کی انجام دہی کے لیے جاتے ہیں جبکہ مکہ مکرمہ شہر کے اقامہ ہولڈرز پرمٹ سے مستثنیٰ ہوں گے۔

واضح رہے امسال 23 اپریل سے ہی مکہ مکرمہ اور مشاعر مقدسہ جانے کے لیے ’مکہ پرمٹ‘ لازمی قرار دیا گیا ہے۔ پرمٹ کے بغیر مکہ مکرمہ جانے والوں کو واپس لوٹا دیا جائے گا۔وزارت داخلہ کی جانب سے عمرہ ویزے پر آنے والے غیرملکیوں کو بھی ہدایت کی گئی ہے کہ وہ 29 اپریل سے قبل اپنے ملکوں کو لوٹ جائیں۔