Live Updates

امریکہ نے یوکرین سے میزائل اور دفاعی نظام مشرق وسطیٰ منتقل کردیا، برطانیہ کا فوجی طیارے تعینات کرنے کا اعلان

یوکرین بھیجے جانے والے 20 ہزار میزائل مشرق وسطیٰ بھیج دیئے گئے، ایرانی فوج نے برطانوی بحریہ کے جہاز کو خلیج فارس میں داخلے سے روک دیا

ساجد علی اتوار 15 جون 2025 11:45

امریکہ نے یوکرین سے میزائل اور دفاعی نظام مشرق وسطیٰ منتقل کردیا، برطانیہ ..

واشنگٹن/لندن/تہران ( اُردو پوائنٹ اخبارتازہ ترین۔ 15 جون2025ء ) ایران کے اسرائیل پر جوابی حملوں کے بعد امریکہ نے یوکرین سے میزائل اور دفاعی نظام مشرق وسطی منتقل کردیا، برطانیہ کی جانب سے مشرقِ وسطیٰ میں فوجی طیارے تعینات کرنے کا اعلان سامنے آگیا، ایرانی فوج نے برطانوی بحریہ کے ڈسٹرایئر جہاز کو خلیج فارس میں داخلے سے روک دیا۔ میڈیارپورٹس کے مطابق امریکی وزیر دفاع نے میزائل اور دفاعی نظام مشرق وسطی منتقل کرنے کی تصدیق کی ہے، اس حوالے سے وزیر دفاع نے کہا کہ ’خطے میں اپنے لوگوں کو بچانے کے لیے تمام وسائل بروئے کار لا رہے ہیں‘، اسی طرح یوکرین کے صدر زیلنسکی نے تصدیق کی ہے کہ ’یوکرین بھیجے جانے والے 20 ہزار میزائل مشرق وسطیٰ بھیج دیئے گئے ہیں‘۔

بتایا گیا ہے کہ برطانیہ بھی مشرقِ وسطی میں اپنے جنگی طیارے اور دیگر فوجی وسائل تعینات کر رہا ہے، برطانوی وزارت خارجہ سے جاری ایک بیان میں کہا گیا ہے کہ اسرائیل کا دفاع جاری رکھیں گے، ہم خطے میں فوجی اثاثے منتقل کر رہے ہیں جن میں طیارے بھی شامل ہیں تاکہ کسی بھی ممکنہ صورتحال سے نمٹنے کے لیے تیار رہا جا سکے، ان اقدامات میں اضافی فاسٹ جیٹ طیاروں اور ایندھن بھرنے والے طیاروں کی تعیناتی شامل ہے تاکہ خطے میں جاری کشیدگی کی صورت میں فضائی معاونت فراہم کی جا سکے۔

(جاری ہے)

دوسری طرف ایرانی فوج نے برطانوی بحریہ کے ڈسٹرایئر جہاز کو خلیج فارس میں داخلے سے روک دیا، ایرانی بحریہ کے ڈرونز کی برطانوی جنگی بحری جہاز کے قریب پروازیں جاری ہیں، برطانوی بیڑے کو خلیج فارس میں داخلے سے روکنے کے لیے وارننگ بھی دی گئی، ایرانی فوج نے کہا کہ وہ برٹش نیوی کے جہاز کو بحر ہند میں داخلے کے وقت سے ہی مانیٹر کر رہی تھی، برطانیہ اسرائیلی میزائلوں کی رہنمائی کے لیے اپنا جنگی بحری جہاز خلیج فارس لانا چاہتا ہے۔