Live Updates

پ*پی ایس ایل‘ حسن علی، وہاب ریاض کا کونسا ریکارڈ توڑنے کے دہانے پر

بدھ 16 اپریل 2025 20:20

لاہور(اُردو پوائنٹ اخبارتازہ ترین - آن لائن۔ 16 اپریل2025ء)پاکستان سپر لیگ (پی ایس ایل) کے 10ویں ایڈیشن میں کراچی کنگز کی نمائندگی کرنیوالے حسن علی نے لاہور قلندرز کیخلاف میچ میں سابق کرکٹر وہاب ریاض ریکارڈ برابر کردیا۔گزشتہ روز نیشنل بینک اسٹیڈیم میں کھیلے گئے میچ میں اوپنر فخر زمان کی سینچری کے باعث کراچی کنگز کو ہوم گراؤنڈ پر شکست کا منہ دیکھنا پڑا تھا تاہم اس میچ میں فاسٹ بولر حسن علی نے سابق کرکٹر وہاب ریاض کا پاکستان سپر لیگ (پی ایس ایل) میں سب سے زیادہ وکٹیں لینے کا ریکارڈ برابر کردیا تھا۔

حسن علی نے میں 4 اوورز میں 28 رنز دیکر 4 کھلاڑیوں کو پویلین کی راہ دیکھائی تھی تاہم وہ ٹیم کو فتح دلوانے میں ناکام رہے۔پی ایس ایل کی تاریخ میں وہاب ریاض نے 87 اننگز میں 113 وکٹیں لی تھیں تاہم حسن علی نے یہ کانامہ محض 83 اننگز میں سرانجام دیا۔

(جاری ہے)

پی ایس ایل کی تاریخ کے ٹاپ وکٹ ٹیکرزکی اس فہرست میں تیسرے نمبر پر شاہین آفریدی کا نام ہے جنہوں نے 74 اننگز میں 108 وکٹیں لے رکھی ہیں، شاداب خان 96 وکٹیں 85 اننگز جبکہ فہیم اشرف 79 وکٹیں 72 اننگز میں حاصل کی ہیں۔

حسن علی کو وہاب ریاض کی سب سے زیادہ وکٹیں لینے کے ریکارڈ کو توڑنے کیلئے محض 1 اور وکٹ درکار ہے، انہیں یہ موقع 18 اپریل کو کوئٹہ گلیڈی ایٹرز کے خلاف مل سکتا ہے۔وہاب ریاض کا ریکارڈ برابر کرنے پر حسن علی کا کہنا تھا کہ میں نے صرف اپنی ٹیم کے لیے اچھی بولنگ کرنے کی کوشش کی، وہاب بھائی ایک عظیم بولر ہیں، ان کا ریکارڈ برابر کرنا اعزاز کی بات ہے۔