Live Updates

لاہور قلندرز کے کھلاڑیوں نے ماحولیاتی آلودگی میں کمی کیلئے حلف اُٹھالیا

جمعرات 1 مئی 2025 21:51

لاہور(اُردو پوائنٹ اخبارتازہ ترین - آن لائن۔ 01 مئی2025ء)پاکستان سپر لیگ (پی ایس ایل) کی 2 بار کی چیمپئین ٹیم لاہور قلندرز نے ماحولیاتی آلودگی میں کمی کیلئے حلف اُٹھالیا۔گزشتہ روز ہوم گراؤنڈ پر لاہور قلندرز نے اسلام آباد یونائیٹڈ کو شکست سے دوچار کیا تھا، یہ شاداب الیون کی ٹورنامنٹ میں پہلی شکست تھی۔میچ کے آغاز سے قبل لاہور قلندرز کی ٹیم نے آلودگی، کوڑا کرکٹ کے خاتمے اور سرسبز ماحول کے فروغ کیلئے مشترکہ طور پر حلف اٹھایا، پنجاب کی سینیئر صوبائی وزیر مریم اورنگزیب نے فرنچائز ٹیم سے حلف لیا، جس کی ویڈیو سوشل میڈیا پلیٹ فارمز پر تیزی سے وائرل ہورہی ہے۔

حلف نامے میں کہا گیا تھا کہ ''میں عہد کرتا ہوں کہ میرے لیے آج سے کرکٹ صرف ایک کھیل نہیں بلکہ کلائمٹ ایکشن کا جذبہ ہے، میں گراؤنڈ پریکٹس اور اپنی روز مرہ زندگی میں ماحولیاتی ذمہ داری بھرپور نبھاؤں گا، میں خود بھی پانی کے ضیاع کو روکنے، اسکے استعمال اور بچت کی عادت کو فروغ دوں گا اور دوسروں کو بھی اس کی آگاہی دوں گا''۔

(جاری ہے)

اسی طرح ''درخت لگانے اور ماحول کو سرسبز بنانے میں کردار ادا کروں گا، دھوئیں اور کوڑا کرکٹ سے بچنے کا پیغام عام کروں گا، دھواں چھوڑنے والی گاڑیوں کے استعمال کی حوصلہ شکنی کروں گا اور خود بھی دھواں چھوڑنے والی گاڑی نہیں چلاؤں گا، پلاسٹک کے کم استعمال اور ری سائیکلنگ کو اپنی عادت بناؤں گا اور اپنے فینز، اپنے دوستوں اور فیملی کو بھی کلائمٹ ایکشن میں شامل ہونے کی دعوت دوں گا''۔

واضح رہے کہ پی ایس ایل کی پوائنٹس ٹیبل پر لاہور قلندرز کی ٹیم 7 میچز میں 4 فتوحات اور 3 شکستوں کیساتھ دوسرے نمبر پر موجود ہے۔