ویمنز کرکٹ ورلڈ کپ کوالیفائرمیں شرکت کیلئے آئی ٹیموں ، آفیشلز ،امپائرز کا واہگہ بارڈر کا دورہ

پاکستانی ، غیر ملکی خواتین کھلاڑیوں نے پاکستانی پرچم اتارنے کی ولولہ انگیز تقریب دیکھی ، خوشی کا اظہار

بدھ 16 اپریل 2025 20:50

لاہور(اُردو پوائنٹ اخبارتازہ ترین - این این آئی۔ 16 اپریل2025ء)آئی سی سی ویمنز کرکٹ ورلڈ کپ کوالیفائرمیں شرکت کے لئے پاکستان آنے والی ٹیموں ، آفیشلز اورمپائرز کو چیئرمین پاکستان کرکٹ بورڈ محسن نقوی کی دعوت پر واہگہ بارڈر کا دورہ کرایا گیا۔پاکستانی و غیر ملکی خواتین کھلاڑیوں نے پاکستانی پرچم اتارنے کی ولولہ انگیز تقریب دیکھی غیر ملکی خواتین کھلاڑی،میچ آفیشلز اور امپائرز تقریب سے بہت محظوظ ہوئے۔

(جاری ہے)

پاکستانی اور غیر ملکی خواتین کھلاڑیوں نے پاکستان زندہ باد اور جیوے جیوے پاکستان کے نعرے بھی لگائے۔رینجرز کے جوانوں کی پریڈ پر ویمنز کھلاڑیوں نے بھر پور داد دی۔ خواتین کھلاڑیوں اور آفیشلز نے پاکستان رینجرز پنجاب کے جوانوں کے ساتھ تصاویر بھی بنوائیں اورسلفیاں لیں اور شاندار و پر جوش تقریب کی تعریف کی۔غیر ملکی کھلاڑیوں نے اظہار خیال کرتے ہوئے کہا کہ ہمارے لیے ایک منفرد تقریب تھی،رینجرز کے جوانوں اور لوگوں کاجوش و خروش دیدنی تھا،پاکستان رینجرز پنجاب کی جانب سے ٹیمز کی کپتان کو سوینئرز بھی دئیے گئے۔