خیبر پختونخوا کے وزیر آبپاشی عاقب اللہ خان کی زیر صدارت سالانہ ترقیاتی پروگرام 2025-26کے جاری و مجوزہ منصوبوں سے متعلق اجلاس کا انعقاد

جمعرات 17 اپریل 2025 08:50

پشاور (اُردو پوائنٹ اخبارتازہ ترین - اے پی پی۔ 17 اپریل2025ء) خیبر پختونخوا کے وزیر برائے آبپاشی عاقب اللہ خان نے کہا ہے کہ سالانہ ترقیاتی پروگرام سے متعلق اجتماعی نوعیت کے منصوبوں کو ترجیح دی جائے گی جبکہ جاری ترقیاتی منصوبوں کی بروقت تکمیل کیلیے بھی موثر اقدامات اٹھا رہے ہیں۔ ان خیالات کا اظہار انہوں نے گزشتہ روز سول سیکرٹریٹ پشاور میں محکمہ آبپاشی کے زیر انتظام سالانہ ترقیاتی پروگرام کے جاری و مجوزہ منصوبوں سے متعلق اجلاس کی صدارت کرتے ہوئے کیا۔

اجلاس میں سیکرٹری محکمہ آبپاشی، چیف انجینئرز ساوتھ و نارتھ کے بشمول دیگر متعلقہ افسران بھی شریک تھے۔ اس موقع پر صوبائی وزیر ابپاشی عاقب اللہ خان کو سالانہ ترقیاتی پروگرام 2025-26 کے جاری و مجوزہ منصوبوں کے بارے تفصیلات سے آگاہ کیا گیا۔

(جاری ہے)

اجلاس میں ایریگیشن سرکل بنوں، ایریگیشن سرکل ڈیرہ اسمعیل خان، ایریگیشن سرکل مردان، ایریگیشن سرکل ہزارہ، ایریگیشن سرکل سوات، ایریگیشن سرکل صوابی اور ضم قبائیلی اضلاع میں جاری و مجوزہ منصوبوں سے متعلق غور و خوض کیا گیا۔

اس موقع پر صوبائی وزیر عاقب اللہ خان نے کہا کہ مسائل کے حل کیلئے اقدامات اٹھائیں گے۔ انہوں نے تعمیراتی معیار پر کوئی سمجھوتہ نہ کرنے پر زور دیا۔ عاقب اللہ خان نے حکام کو تمام امور بروقت نمٹانے کے لیے ہدایات جاری کیں۔ انہوں نے تمام ایکسین صاحبان کی اجلاس بلانے اور اہم منصوبوں کی نشاندہی کرانے جبکہ انہیں حتمی رپورٹ پیش کرانے کیلیے بھی احکامات جاری کئے۔