Live Updates

عمران خان اور بشریٰ بی بی کی سزا معطلی و رہائی کی درخواستیں جلد مقرر کرنے کی استدعا منظور

190 ملین پاؤنڈز کیس میں سزا معطلی کی درخواستوں پر جلد سماعت کی اپیل پر اسلام آباد ہائیکورٹ کے قائم مقام چیف جسٹس سرفراز ڈوگر اور جسٹس انعام امین منہاس کی جانب سے سماعت کی گئی

ساجد علی جمعرات 17 اپریل 2025 13:06

عمران خان اور بشریٰ بی بی کی سزا معطلی و رہائی کی درخواستیں جلد مقرر ..

اسلام آباد ( اُردو پوائنٹ اخبارتازہ ترین۔ 17 اپریل 2025ء ) پاکستان تحریک انصاف کے بانی چیئرمین عمران خان اور ان کی اہلیہ بشریٰ بی بی کی سزا معطلی و رہائی کی درخواستیں جلد مقرر کرنے کی استدعا منظور کرلی گئی، تاہم عدالت نے مرکزی کیس کی آئندہ سماعت کی تاریخ نہیں دی، قائم مقام چیف جسٹس سرفراز ڈوگر نے کہا کہ اسلام آباد ہائیکورٹ کے ڈویژن بنچ نے جوڈیشل آرڈر جاری کر دیا ہے اب تاریخ تو نہیں دے سکتے۔

تفصیلات کے مطابق سابق وزیراعظم عمران خان اور ان کی اہلیہ بشریٰ بی بی نے 190 ملین پاؤنڈز کیس میں جلد سماعت کی درخواستیں دائر کی ہوئی ہیں، انہوں نے کیس کے فیصلے کے خلاف اپیلیں اور سزا معطلی کی درخواست دائر کیں، اسلام اباد ہائیکورٹ نے عمران خان اور بشریٰ بی بی کی جانب سے 190 ملین پاؤنڈز کیس میں سزا معطلی کی درخواستوں پر جلد سماعت کی استدعا عدالت نے منظور کی ہے، اس حوالے سے سماعت اسلام آباد ہائی کورٹ کے قائم مقام چیف جسٹس سرفراز ڈوگر اور جسٹس انعام امین منہاس نے کی، آج کی سماعت میں عدالت نے بانی پی ٹی آئی اور ان کی اہلیہ کی اپیلیں اور سزا معطلی کی جلد سماعت کی متفرق درخواستیں منظور کرلیں۔

(جاری ہے)

بتایا گیا ہے کہ عدالت بانی پی ٹی آئی کی جانب سے وکیل ظہیر عباس ایڈووکیٹ اور عثمان گل پیش ہوئے جب کہ بشریٰ بی بی کی جانب سے وکیل علی بخاری ایڈووکیٹ عدالت میں پیش ہوئے جہاں دورانِ سماعت وکیل علی بخاری ایڈووکیٹ نے عدالت سے استدعا کی کہ ’سزا معطلی کی درخواستیں بھی مقرر کرنے کی تاریخ دے دیں‘، اس پر قائم مقام چیف جسٹس نے ریمارکس دیئے کہ ’ڈویژن بینچ نے کیسز مقرر کرنے سے متعلق جوڈیشل آرڈر جاری کر دیا ہے، جوڈیشل آرڈر کے بعد ہم ڈائریکٹ کوئی تاریخ نہیں دے سکتے، ہم سزا کے خلاف اپیلوں کے ساتھ سزا معطلی کی درخواستیں بھی دیکھ لیں گے‘۔