بی جے پی حکومت منصوبہ بند طریقے سے کشمیر میں آبادی کا تناسب تبدیل کر رہی ہے، سول سوسائٹی

370 اور 35اے کی دفعات کی منسوخی کی بنیادی وجہ علاقے میں آبادی کے تناسب کو تبدیل کرنا ہے

جمعرات 17 اپریل 2025 15:33

سری نگر(اُردو پوائنٹ اخبارتازہ ترین - این این آئی۔ 17 اپریل2025ء)بھارت کے غیر قانونی زیر قبضہ جموںوکشمیر میں سول سوسائٹی نے کہا ہے کہ بی جے پی کی بھارتی حکومت علاقے میں مسلمانوںکی اکثریت کو اقلیت میں بدلنے کی ایک منصوبہ بند ساز ش پر عمل پیراہے اور وہ اس مقصد کے حصول کیلئے مختلف ہتھکنڈے استعمال کرر ہی ہے۔کشمیرمیڈیاسروس کے مطابق سول سوسائٹی ارکان ڈاکٹر زبیر احمد راجہ، محمد فرقان، محمد اقبال شاہین اور سید حیدر حسین نے سرینگر میں ایک اجلاس میں کہا کہ 370 اور 35اے کی دفعات کی منسوخی کی بنیادی وجہ علاقے میں آبادی کے تناسب کو تبدیل کرنا ہے ۔

انہوںنے کہا کہ مودی حکومت نے علاقے کی خصوصی حیثیت کی منسوخی کے بعد یہاں کے ڈومیسائل قوانین میں تبدیلی لائی اور علاقے کی اسمبلی میں حال میں اعتراف کیا گیا کہ اب تک 83ہزار غیر کشمیریوںکو یہاں کے ڈومیسائل دیے جا چکے ہیں۔

(جاری ہے)

انہوںنے کہا کہ بھارت نے کشمیریوںکو خوف و دہشت کا شکار کرنے اورانہیں دیوار کیساتھ لگانے کیلئے علاقے میں دس لاکھ سے زائد دفورسز اہلکار تعینات کررکھے ہیں ، قابض اہلکاروںکو کالے قانون آرمڈ فورسز سپیشل پاورز ایکٹ کے تحت بے لگام اختیارات حاصل ہیں ، بھارتی مظالم کے خلاف آواز اٹھانے والوںکو ’’پبلک سیفٹی ایکٹ اور یو اے پی اے ‘‘جیسے کالے قوانین کے تحت سلاخوں کے پیچھے ڈال دیا جا تاہے۔

سول سوسائٹی کے ارکان نے کہا کہ بھارت مقبوضہ جموںوکشمیر میں بالکل اسی پالیسی پر عمل پیرا ہے جو اسرائیل نے فلسطین میں اپنا رکھی ہے۔انہوں نے کہا کہ کشمیری پنڈتوں اور غیر کشمیریوں کے لیے علاقے میں علیحدہ کالونیوں کا قیام اسرائیلی طرز کی پالیسیوںکا عکاس ہے۔ انہوںنے کہا کہ جموںوکشمیر عالمی سطح پر تسلیم شدہ ایک متنازعہ خطہ ہے لہذا یہ عالمی برادری کی ذمہ داری ہے کہ وہ علاقے میں جاری غیر قانونی بھارتی اقدامات کا نوٹس لے اور تنازعہ کشمیر کے حل کیلئے بھارتی قیادت پر دبائو ڈالے۔