سیدومیڈیکل کالج سوات میں جدید کمپیوٹربیسڈ امتحانی ہال کا افتتاح

ہفتہ 19 اپریل 2025 20:43

پشاور (اُردو پوائنٹ اخبارتازہ ترین - اے پی پی۔ 19 اپریل2025ء) خیبرپختونخوا کے وزیرلائیو سٹاک ، فشریزوکوآپریٹیو فضل حکیم خان نے سیدو میڈیکل کالج سوات میں جدید کمپیوٹر بیسڈ امتحانی ہال کا باقاعدہ افتتاح کر دیا۔ ہفتہ کو تقریب سے خطاب کرتے ہو ئے انہوں نے کہا کہ موجودہ صوبائی حکومت تعلیم اورٹیکنالوجی کے فروغ کے لیے ٹھوس اقدامات کر رہی ہے اورجدید امتحانی نظام کا قیام اس سلسلے کی ایک اہم کڑی ہے۔

انہوں نے کہا کہ کمپیوٹر بیسڈ امتحانی ہال سے طلبہ کی قابلیت کو شفاف اورمیرٹ پر جانچنے میں مدد ملے گی۔ انہوں نے مزید کہا کہ میرٹ اور شفافیت ہماری اولین ترجیحات میں شامل ہیں اورصوبائی حکومت نے اس عزم کا اعادہ کیا ہے کہ صوبے میں میرٹ کی بالادستی اور نظام میں شفافیت کو ہرصورت یقینی بنایا جائے گا ۔

(جاری ہے)

انہوں نے کہا کہ اداروں کو سیاسی مداخلت سے پاک کرنا اورتمام فیصلوں کو اہلیت کی بنیاد پرکرنا وقت کی اہم ضرورت ہے اوریہی رویہ ملک کو ترقی کی راہ پر گامزن کر سکتا ہے۔

تقریب سے ایم این اے سلیم الرحمن، مئیر تحصیل بابوزئی شاہد علی خان، چیف ایگزیکٹو سیدو گروپ آف ٹیچنگ ہسپتال پروفیسرڈاکٹراسرارالحق نے بھی خطاب کئے۔ تقریب کے اختتام پر صوبائی وزیر اور دیگر نے مختلف شعبہ جات کے ماہر ڈاکٹروں اور فیکلٹی ممبران کو ان کی شاندار خدمات پر تعریفی اسناد بھی پیش کیں۔ شرکاء کا کہنا تھا کہ یہ اقدام نہ صرف تعلیمی معیارکو بلند کرنے کا باعث بنے گا بلکہ مستقبل کے معیاری میڈیکل پروفیشنلزکی تیاری میں بھی سنگ میل ثابت ہوگا۔