پنجاب میں غیر معمولی ہیٹ ویو کا خدشہ

لاہور (اُردو پوائنٹ اخبارتازہ ترین۔ 19 اپریل2025ء) پنجاب میں غیر معمولی ہیٹ ویو کا خدشہ، تعلیمی اداروں میں موسم گرما کی تعطیلات کب ہوں گی؟۔ تفصیلات کے مطابق پنجاب بھر میں رواں موسم گرما کے دوران غیر معمولی ہیٹ ویو کا خدشہ ہے تاہم اس کے باوجود محکمہ سکول ایجوکیشن پنجاب نے قبل از وقت تعطیلات کے بجائے سالانہ کلینڈر کے مطابق یکم جون سے موسم گرما کی چھٹیوں کی اجازت مانگ لی۔

محکمہ سکول ایجوکیشن نے یکم جون سے چھٹیاں دینے کی سمری وزیر اعلی کو بھی بھجوا دی۔ اس حوالے سے سیکرٹری ایجوکیشنکے مطابق سکولوں میں ہیٹ ویو کی وجہ سے جلد بھی چھٹیاں دی جاسکتی ہیں،موسم گرما کی چھٹیاں دینے کے حوالے سے سمری وزیر اعلی پنجاب کو بھیجوائی جاچکی ہے، چھٹیاں جلد دینے یا نہ دینے کا حتمی منظوری وزیر اعلی پنجاب دیں گی۔

(جاری ہے)

جبکہ والدین نے مطالبہ کیا ہے کہ گرمی کی غیر معمولی لہر کی آمد کے پیش نظر ناصرف سکولوں ک اوقات کار کم کیے جائیں، ساتھ ساتھ تعطیلات کا شیڈول بھی جلد جاری کیا جائے ۔ دوسری جانب میڈیا رپورٹس کے مطابق پنجاب میں گرمی کی شدت میں غیر معمولی اضافہ ہونے کے امکان کے پیشن نظر تعلیمی اداروں میں قبل از وقت موسم گرما کی تعطیلات دے دیے جانے کا امکان ہے۔

میڈیا رپورٹس کے مطابق اس حوالے سے پی ڈی ایم اے کی جانب سے باقاعدہ مراسلہ تیار کر کے ارسال کیا گیا ہے۔ بتایا گیا ہے کہ رمضان المبارک کا اختتام ہونے کے بعد ملک بھر میں گرمی کی شدت میں اضافہ ہوا ہے، جبکہ پنجاب کے ہیٹ ویو سے متاثر ہونے کا امکان ہے۔ اسی باعث پی ڈی ایم اے نے پنجاب میں موسم گرما کی تعطیلات کے حوالے سے تجویز دی ہے۔ ہیٹ ویو کے خطرے کے پیش نظر پی ڈی ایم اے نے پنجاب کے محکمہ اسکول ایجوکیشن، ہائیر ایجوکیشن اور صوبے بھر کے کمشنرز و ڈپٹی کمشنرز کو مراسلہ جاری کیا ہے۔

مراسلے میں پی ڈی ایم اے کی جانب سے موقف اختیار کیا گیا ہے کہ اسکولوں کے اوقات میں رد و بدل کیا جائے ، جبکہ گرمی کی شدت مزید بڑھنے کی صورت میں موسم گرما کی چھٹیوں کا جلد اعلان کیا جائے۔ مراسلے میں مزید کہا گیا کہ شدید گرمی کے دوران اسکولوں اور کالجز میں بلا تعطل صاف اور ٹھنڈے پانی کی دستیابی کو یقینی بنایا جائے، بچوں کو واضح ہدایات کی جائیں کہ ہلکے، ڈھیلے ڈھالے کپڑے استعمال کریں اور عارضی طور پر آؤٹ ڈور سرگرمیوں پر فی الفور پابندی عائد کی جائے، کلاس رومز کی وینٹیلیشن، پنکھے اور کولنگ سسٹم کو بھی فعال رکھا جائے، اسکولوں میں ابتدائی طبی امداد کاؤنٹرز قائم کیے جائیں اور ہیٹ ویو بارے تربیت یافتہ اسٹاف کو ڈیوٹی پر مامور کیا جائے۔

ڈسٹرکٹ ڈیزاسٹر مینجمنٹ اتھارٹیز کے ساتھ مسلسل رابطہ قائم رکھا جائے تا کہ معلومات کی ترسیل بروقت جاری رہے۔ محکمہ موسمیات نے بھی ہیٹ ویو کی ایڈوائزری جاری کی ہے جس کے مطابق اسکولوں میں بچوں کی آؤٹ ڈور سرگرمیوں پر پابندی کی ہدایت کی گئی ہے۔ محکمہ موسمیات کے مطابق درجہ حرارت میں 4 سے 7 ڈگری تک اچانک اضافے کا خدشہ ہے اور یہ صورتحال شہریوں کے لیے خطرناک ہو سکتی ہے۔