سندھ حکومت کی جانب سے ٹریفک قوانین کی خلاف ورزی پرکریک ڈائون ،ہزاروںموٹر سائیکلیں ضبط

اتوار 20 اپریل 2025 18:00

کراچی (اُردو پوائنٹ اخبارتازہ ترین - اے پی پی۔ 20 اپریل2025ء) سندھ حکومت کی جانب سے ٹریفک قوانین کی خلاف ورزی کرنے والوں کے خلاف جاری کریک ڈائون کے دوران اب تک مجموعی طورپر17ہزار 980موٹر سائیکلیں ضبط کرلی گئی ہیں۔

(جاری ہے)

اتوار کوجاری اعلامیہ کے مطابق سندھ کے سینئر وزیربرائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ فینسی نمبر پلیٹس، ٹنٹڈ گلاس اور دیگر غیر قانونی لوازمات کے خلاف 1,295کارروائیاں عمل میں لائی گئیں،308ہیوی اور لائٹ ٹرانسپورٹ گاڑیاں ضبط کی گئیں جبکہ 230گاڑیوں کی رجسٹریشن کو عارضی طور پر معطل کرتے ہوئے مخصوص شرائط کے تحت چھوڑا دیاگیاہے،شرائط میں تکنیکی بہتری، فٹنس سرٹیفکیٹ کی تجدید اور دیگر عوامل شامل ہیں۔

انہوں نے کہا کہ کارروائیاں بلا تفریق جاری رہیں گی،قانون کی خلاف ورزی کسی صورت برداشت نہیں کی جائے گی۔انہوں نے کہا کہ ٹریفک بے ضابطگیوں سے شہریوں کی جانوں کو خطرہ لاحق ہوتا ہے، کریک ڈائون شہریوں کی جان و مال کے تحفظ کیلئے کیا جارہا ہے۔شرجیل انعام میمن نے مزید کہا کہ یہ مہم صرف آغاز ہے اور آنے والے دنوں میں مزید سخت اقدامات کیے جائیں گے،شہری قانون نافذ کرنے والے اداروں سے مکمل تعاون کریں اور غیر قانونی لوازمات سے گریز کریں۔