علامہ اقبال ؒ کی تعلیمات ہمارے لئے مشعل راہ ہیں،وزیراعظم شہباز شریف

اقبالؒ کے فلسفے کو اپنا کر معاشی خود انحصاری، یکجہتی کو فروغ دینا ہو گا،علامہ اقبال ؒ کے فلسفہ خودی اور شاعری نے تحریک پاکستان کو نظریاتی بنیاد فراہم کی،وزیراعظم کا شاعر مشرق کے یوم وفات پر پیغام

فیصل علوی پیر 21 اپریل 2025 10:46

علامہ اقبال ؒ کی تعلیمات ہمارے لئے مشعل راہ ہیں،وزیراعظم شہباز شریف

اسلام آباد(اردوپوائنٹ اخبار تازہ ترین۔21اپریل 2025)وزیراعظم شہباز شریف کا کہنا ہے کہ علامہ اقبال ؒکی تعلیمات ہمارے لئے مشعل راہ ہیں،اقبالؒ کے فلسفے کو اپنا کر معاشی خود انحصاری، یکجہتی کو فروغ دینا ہو گا،ہمیں ان کے فلسفے کو اپناتے ہوئے معاشی خود انحصاری، تعلیمی انقلاب اور قومی یکجہتی کو فروغ دینا ہوگا،وزیر اعظم شہباز شریف نے شاعرمشرق علامہ محمد اقبالؒ کے یوم وفات پر پیغام دیتے ہوئے کہا ہے کہ علامہ اقبالؒ نے برصغیر کے مسلمانوں کیلئے ایک الگ وطن کا تصور پیش کیا، آج ہم پاکستان کے نظریاتی معمار، عظیم مفکر اور شاعر مشرق ڈاکٹر علامہ محمد اقبالؒ کو ان کی یومِ وفات پر خراجِ عقیدت پیش کرتے ہیں۔

ان کا فلسفہ خودی اور شاعری نے تحریک پاکستان کو نظریاتی بنیاد فراہم کی۔

(جاری ہے)

آج جب پاکستان کو سماجی تقسیم اور عالمی چیلنجز کا سامنا ہے تو ایسے میں ہمارے لئے ڈاکٹر علامہ اقبال ؒکی تعلیمات ہمارے لئے مشعل راہ ہیں۔انہوں نے کہا کہ علامہ اقبالؒ نے علم، عمل، یقین محکم اور خود اعتمادی پر زور دیا ہے۔ ہمیں ان کے فلسفے کو اپناتے ہوئے معاشی خود انحصاری، قومی یک جہتی کو فروغ دینا ہو گا۔

اقبال ؒکا فلسفہ، شاعری ہمیں بتاتی ہے ایک مثالی معاشرہ کیسے تعمیر کیا جا سکتا ہے، ایسا معاشرہ جہاں انصاف، محنت اور اخلاقیات کو فوقیت حاصل ہو۔ وزیراعظم شہباز شریف کا اپنے پیغام میں مزید کہنا تھا کہ اقبال ؒصرف ایک شاعر ہی نہیں بلکہ ایک ایسے اہل بصیرت رہنما تھے جنہوں نے برصغیر کے مسلمانوں کیلئے ایک الگ وطن کا تصور پیش کیا۔ ان کا فلسفہ خودی اور ان کی شاعری نے نہ صرف تحریک پاکستان کو نظریاتی بنیاد فراہم کی بلکہ بر صغیر پاک و ہند کے مسلمانوں کے اندر ایک نئی روح پھونک دی۔

نوجوان نسل کو مخاطب کرتے ہوئے وزیراعظم نے کہا کہ علامہ اقبال ؒنے ہمیشہ نوجوانوں کو قوم کا اصل سرمایہ قرار دیا۔ اقبال ؒکے نزدیک نوجوان ہی وہ طاقت ہیں جو قوموں کوعروج پر پہنچا سکتے ہیں، آج کے نوجوانوں کو چاہیے کہ وہ اقبال ؒکے پیغام کو سمجھیں، جدید علوم حاصل کریں۔انہوں نے مزید کہا ہے کہ ہم پر یہ ذمہ داری عائد ہوتی ہے کہ اقبال ؒکے خوابوں کو حقیقت بنائیں، ہمیں نوجوانوں کو با اختیار بنانا ہے تاکہ وہ ملکی ترقی میں کلیدی کردار ادا کر سکیں۔

شہباز شریف کا کہنا تھا کہ علامہ اقبالؒ نے نے نسل نو کو شاہین سے تعبیر دیتے ہوئے جہدمسلسل، حصول علم اور اعلیٰ اخلاقی اقدار اپنانے کی تلقین کی۔ اقبالؒ کے نزدیک نوجوان ہی وہ طاقت ہیں جو قوموں کو زوال سے نکال کر عروج پر پہنچا سکتے ہیں۔انہوں نے مشورہ دیا کہ آج کے نوجوانوں کو چاہیے کہ وہ اقبال ؒکے پیغام کو سمجھیں، جدید علوم حاصل کریں، اور ملک کی ترقی میں اپنا بھرپور کردار ادا کریں۔ یہی وہ پیغام ہے جو ہمارے نوجوانوں کو ہر میدان میں کامیابی کی طرف لے جا سکتا ہے۔