اسلام آباد ہائی کورٹ کے ججز کے تبادلے اور سنیارٹی سے متعلق کیس کی سماعت کل ہوگی

پیر 21 اپریل 2025 21:16

اسلام آباد (اُردو پوائنٹ اخبارتازہ ترین - آن لائن۔ 21 اپریل2025ء) سپریم کورٹ نے اسلام آباد ہائی کورٹ کے ججز کے تبادلے اور سنیارٹی سے متعلق کیس کی سماعت کل منگل کوکرے گی ،پانچ رکنی آئینی بنچ کے سربراہ جسٹس محمد علی مظہر نے کہاتھا کہ کیس کی روزانہ کی بنیاد پر سماعت منگل سے کی جائے گی، بعدازاں آئینی بینچ نے سماعت 22 اپریل تک ملتوی کر دی تھی۔

سابقہ سماعت پر اٹارنی جنرل منصور عثمان اعوان نے عدالت کو آگاہ کیا تھاکہ جسٹس سرفراز ڈوگر، جسٹس خادم سومرو اور جسٹس محمد آصف نے کوئی وکیل مقرر نہیں کیا۔ ان ججز کا مؤقف ہے کہ آئینی بینچ جو بھی فیصلہ کرے گا، وہ اسے قبول کریں گے۔سپریم کورٹ نے اسلام آباد ہائی کورٹ بار ایسوسی ایشن کی جانب سے دائر کردہ درخواست کو واپس لینے کی بنیاد پر خارج کر دیاتھا۔

(جاری ہے)

جسٹس محمد علی مظہر نے پوچھا کہ کیا انہوں نے تحریری جواب جمع کرایا ہے، تو ایڈووکیٹ جنرل نے کہا کہ ابھی جواب جمع نہیں کرایا گیا۔ جس پر عدالت نے انہیں جواب جمع کرانے کی اجازت دی۔متاثرہ ججز کے وکیل منیر اے ملک نے دلائل دیے کہ وفاقی حکومت نے ججز کی آمادگی کے بیانات یا صدرِ مملکت و چیف جسٹس کی منظوری کا کوئی دستاویزی ثبوت جمع نہیں کرایا۔

انہوں نے موقف اختیار کیا کہ یہ سارا پراسیس متنازع ہے۔ تاہم اٹارنی جنرل نے مؤقف اپنایا کہ تمام عمل رضامندی سے ہوا ہے اور یہ معاملہ متنازع نہیں ہے۔جسٹس محمد علی مظہر نے ریمارکس دیے کہ اگر یہ معاملہ متنازع نہیں تو آمادگی کے بیانات عدالت میں پیش کیے جائیں۔ اٹارنی جنرل نے عدالت کو یقین دہانی کرائی کہ یہ بیانات جمع کروا دیے جائیں گے۔بینچ کے رکن جسٹس نعیم اختر افغان نے کہا کہ عدالت دیکھنا چاہتی ہے کہ یہ معاملہ شروع کہاں سے ہوا۔عدالت نے کیس کی مزید سماعت 22 اپریل تک کے لیے ملتوی کردی تھی۔