Live Updates

بابر اعظم نے پی ایس ایل میں منفرد اعزاز اپنے نام کرلیا

پشاور زلمی کے کپتان کراچی کنگز کیخلاف میچ میں 41 گیندوں پر 6 چوکوں کی مدد سے 46 رنز بنا کر خوشدل شاہ کی گیند پر ایل بی ڈبلیو آئوٹ قرار پائے تھے

ذیشان مہتاب منگل 22 اپریل 2025 11:31

لاہور (اردو پوائنٹ تازہ ترین اخبار ۔ 22 اپریل 2025ء ) پشاور زلمی کے کپتان بابر اعظم نے پی ایس ایل میں منفرد اعزاز اپنے نام کرلیا۔

بابر اعظم گزشتہ روز کراچی کنگز کیخلاف میچ میں 41 گیندوں پر 6 چوکوں کی مدد سے 46 رنز بنا کر خوشدل شاہ کی گیند پر ایل بی ڈبلیو آئوٹ قرار پائے۔

یہ بابر اعظم کے پی ایس ایل کیریئر میں 8واں موقع تھا جب وہ ایک میچ میں 40 سے 50 رنز کے درمیان آئوٹ ہوئے۔

اس فہرست میں ایلکس ہیلز اور جیمز ونس 6،6 مرتبہ 40 سے 50 کے درمیان آئوٹ ہوکر مشترکہ طور پر دوسرے نمبر پر ہیں۔

واضح رہے کہ پاکستان سپر لیگ (پی ایس ایل) 10 میں کراچی کنگز نے پشاور زلمی کو سنسنی خیز مقابلے کے بعد دو وکٹوں سے شکست دیدی۔

نیشنل اسٹیڈیم کراچی میں کھیلے گئے ایونٹ کے 11 ویں میچ میں کراچی کنگز نے 148 رنز کا ہدف 8 وکٹوں کے نقصان پر آخری اوور میں حاصل کیا۔

(جاری ہے)

کپتان ڈیوڈ وارنر 60 رنز بنا کر نمایاں رہے۔ خوشدل شاہ نے 23 رنز ناٹ آؤٹ بنا کر ٹیم کو فتح سے ہمکنار کرایا، محمد نبی 14، جیمز ونس 11، عرفان خان 10، سعد بیگ 9، عباس آفریدی 2، عامر جمال 1 اور ٹِم سائفرٹ 0 جبکہ حسن علی 6 رنز بنا کر ناٹ آؤٹ پویلین لوٹے۔

پشاور زلمی کی جانب سے لیوک ووڈ نے 3، علی رضا نے 2 جبکہ عارف یعقوب اور الزاری جوزف نے 1، 1 وکٹ حاصل کی۔

اس سے قبل پشاور زلمی نے کراچی کنگز کی دعوت پر پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 147 رنز اسکور کیے۔ کپتان بابراعظم 46 رنز بنا کر نمایاں رہے، محمد حارث 28، حسین طلعت 18، ٹام کوہلر-کیڈمور 7، مچل اوون 5، صائم ایوب 4، لیوک ووڈ 2 اور عبدالصمد 2 رنز بنا کر آؤٹ ہوئے، الزاری جوزف 24 اور عارف یعقوب 1 رن بنا کر ناٹ آؤٹ رہے۔

کنگز کی جانب سے خوشدل شاہ اور عباس آفریدی نے 3، 3 جبکہ میر حمزہ اور عامر جمال نے 1، 1 وکٹ حاصل کی۔