بھارتی ریاست کیرالہ میں آر ایس ایس کا کالج میں ہتھیاروں کا تربیتی کیمپ

منگل 22 اپریل 2025 13:44

ترواننت پورم (اُردو پوائنٹ اخبارتازہ ترین - اے پی پی۔ 22 اپریل2025ء) بھارتی ریاست کیرالہ کے دارالحکومت ترواننت پورم کے ایک کالج میں ہندوتوا تنظیم راشٹریہ سویم سیوک سنگھ (آر ایس ایس ) کی طرف سے ہتھیاروں کے تربیتی کیمپ کا انعقاد کیا گیا ہے ، جس کے خلاف طلبہ تنظیموں نے بڑے پیمانے پر احتجاج شروع کر دیاہے۔کشمیر میڈیا سروس کے مطابق سنگھ پریوار سے وابستہ ہندوتواتنظیم آر ایس ایس نے 2مئی کو طے شدہ تربیتی پروگرام کی تیاری کے لیے مار ایوانوس کالج کے احاطے میں کیمپ کا انعقاد کیاتھا۔

کیمپ کی فوٹیج میں مردوں کو کالج گرانڈ میں ہتھیاروں کی مشق کرتے ہوئے دکھایا گیا ہے۔کالج میں کیمپ کے انعقاد پر بڑے پیمانے پر آر ایس ایس پر تنقید کی جارہی ہے ۔سٹوڈنٹس فیڈریشن آف انڈیااور کیرالہ سٹوڈنٹس یونین نے مشترکہ طور پر غصے کا اظہار کرتے ہوئے اس واقعے کو ’’امن اور سماجی ہم آہنگی کے لیے سنگین خطرہ‘‘ قرار دیا۔

(جاری ہے)

سٹوڈنٹس فیڈریشن آف انڈیاکی ترواننت پورم ضلع کمیٹی نے بیان میں کہاہے کہ تعلیمی ادارے تعلیم کے حصول کے لئے ہیں، خوف پھیلانے یا تشدد پراکسانے کے لئے نہیں۔

آر ایس ایس کو کالج کیمپس میں ہتھیاروں کی تربیت دینے اور نوجوانوں کے ذہنوں کو نفرت کے ساتھ زہر آلود کرنے کا کوئی حق نہیں ہے۔ کیرالہ سٹوڈنٹس یونین کے ترجمان نے بھی اسی طرح کے خدشات کااظہار کرتے ہوئے کہا ہے کہ طلبہ تنظیموں کو کیمپس میں اپنے جھنڈے لانے کی بھی اجازت نہیں ہے لیکن آر ایس ایس کو کالج گرائونڈ میں ہتھیاروں کی تربیت دینے کی اجازت دی گئی ہے جو انتہائی شرمناک ہے ۔دونوں طلبہ تنظیموں نے کالج انتظامیہ، پرنسپل اور دیگر حکام سے اس سلسلے میں اپنا کردار واضح کرنے کا مطالبہ کیا ہے۔