سعودیہ کا حج سیزن میں ویزہ مدت سے زائد قیام پر سخت سزاؤں کا اعلان

تمام غیرملکی اور زائرین اپنے ویزے کی شرائط پر سختی سے عمل کریں اور مقررہ مدت کے اندر مملکت سے روانہ ہو جائیں تاکہ قانونی کارروائی سے بچا جا سکے؛ سعودی وزارت داخلہ کا بیان

ساجد علی بدھ 23 اپریل 2025 13:25

سعودیہ کا حج سیزن میں ویزہ مدت سے زائد قیام پر سخت سزاؤں کا اعلان

ریاض ( اُردو پوائنٹ اخبارتازہ ترین۔ 23 اپریل 2025ء ) سعودی عرب نے حج سیزن میں ویزہ مدت سے زائد قیام پر سخت سزاؤں کا اعلان کردیا۔ تفصیلات کے مطابق سعودی وزارت داخلہ کی جانب سے واضح کیا گیا ہے کہ ان غیر ملکیوں کے خلاف سخت قانونی کارروائی کی جائے گی جو مملکت میں اپنے ویزے کی مقررہ مدت ختم ہونے کے بعد بھی مقیم رہتے ہیں، یہ اعلان حج سیزن سے قبل مملکت میں زائرین کے داخلے اور قیام کو منظم کرنے کی مہم کا حصہ ہے، جس کے تحت ویزہ ختم ہونے کے باوجود قیام کرنے والوں پر 50 ہزار ریال تک جرمانہ، 6 ماہ تک قید اور قید کی سزا پوری ہونے کے بعد ملک بدر کیا جاسکتا ہے۔

وزارت داخلہ کا کہنا ہے کہ وزٹ ویزے پر آنے والے افراد کو حج کی اجازت نہیں ہے، تمام غیر ملکیوں اور زائرین کو ہدایت کی جاتی ہے کہ وہ اپنے ویزے کی شرائط پر سختی سے عمل کریں اور مقررہ مدت کے اندر مملکت سے روانہ ہو جائیں تاکہ قانونی کارروائی سے بچا جا سکے۔

(جاری ہے)

بتایا گیا ہے کہ 23 اپریل 2025ء سے صرف وہ افراد مکہ مکرمہ میں داخل ہو سکیں گے جو مقدس مقامات پر کام کرنے کے اجازت نامہ، مکہ مکرمہ میں سکونت کا ثبوت یا باضابطہ حج پرمٹ رکھتے ہوں گے، عمرہ ویزہ پر سعودی عرب میں داخلے کی آخری تاریخ 13 اپریل 2025 مقرر تھی، اب تک مملکت میں مقیم ایسے تمام زائرین کو 29 اپریل 2025ء تک ملک چھوڑنے کی ہدایت کی گئی ہے، حج و عمرہ کمپنیوں پر بھی زور دیا گیا ہے کہ وہ ایسے زائرین کی اطلاع دیں جو ویزہ ختم ہونے کے باوجود ملک میں موجود ہوں، خلاف ورزی کی صورت میں 1 لاکھ ریال تک جرمانہ کیا جا سکتا ہے جو متعدد خلاف ورزیوں پر مزید بڑھ سکتا ہے۔